**&& حكاية مريم وعصفور **&&

الحلقة الاولي

كانت عندي حركة بايخة جداً جداً .. وكانت بتدخلني في حرج شديد مع الناس .. من انا قمت صغير قامت معاااي العادة دي .. نظرا لي كترة الحكاوي او الاحاجي بشكل دقيق .. الكانت بتحكيها لي حبوبتي .. كبرت وكبرت معاي فكرة انو خلف كل وجه قصة وحكاية .. بغض النظر عن الوجه ده سعيد ولا حزين ولا مافيهو اي ملامح .. والاخير ده تحديداً كنت بفتش عليهو .. لانو بشعرني بي متعة مبالغ فيها .. لكوني بجتهد شديد جدا في رسم الحكاية خلف هذه الوجة .. تلقاني من الصباح وانا طالع علي الشغل .. اعاين لي جارتنا تهاني وهي جاية من الدكان مبسوطة وتتبسم ساااي .. اعرف ليك انو الدنيا معاها باسطة التحويلة وصلت والديون اتسددت .. وممكن تمشي السوق بي نفس فاااتحة .. واهي مفرحة اولادها معاها وجايبة ليهم بسكويت يشربوا بيهو الشاي وهكذا .. و اعاين اشوف عوض الله جارنا وهو مارق من البيت مستعجل وصاري ليك وشو كيف كيف .. اعرف ليك انو متشاكل مع المدام كالعادة .. اقيف ليك في المحطة واعاين ليك للناس دي .. وانسج القصص بي مزاج شديد .. ومتعة اشد لو حسيت انو في زول مضايق من معاينتي ليهو دي .. اقوم اسرق النظرات كده واتابع انفعالاتو مع نظراتي دي واتكيف من جوة .. اركب في المواصلات اعاين للركاب واحد واحد .. واعاين للكمساري كداااااا .. وارسم ليهو حكاية بي مزاج .. من ملاح وشو اقدر احدد هو من وين في السودان ده .. واتخيل ليك انو ما قدر يكمل دراستو لاسباب الفلس وكده .. وعندو اخوان صغار في البيت حارسنو لانو ابوهم متوفي ولا بقي كبير وعيان في البيت .. قد تختلف التفاصيل من حين لاخر مع اختلاف الكمساري وملامح وشو وكده ..

ماشي عليها بي مزاج كده .. اشوف ليك وشها متغير .. ما ياهو الوش الاتعودت عليهو من وانحنا شفع صغار .. وحسيت ليك بيها مرتبكة كده شديد .. تشيل غطاء الحلة تعاين في الحلة وترجعوا تاااني .. ترفع الكفتيرة وتنزلها .. والزباين واقفين ليها في راسة وهي ولا شغالة بيهم .. ترفع الهبابة تهبب في الكانون بي عيون زايقة كده .. وترفع طرف توبها من الواطة وترد للزبائن بعد مده وتقول ليهم .. جاياكم جاياكم اصبرو لي بس .. اتحيرت شديد خلاص .. الليلة مريم دي الحاصل عليها شنو ؟؟!! .. اصلاً ما براها .. ياربي يكون عندها زول عيان ولا شنو ؟؟!! قدر ما قلت اعرف الحاصل عليها شنو من تعابير وشها .. خانتني كل خبرتي القديمة في معرفة الحاصل .. تعبت جنس تعب .. شلت كرعيني ومشيت عليها :
- سلامات يا مريم .. مالك الليلة شكلك محتارة كده
- اهلين ياعمر .. تقول شنو بس .. الليلة حالتي تحنن ياخ
- شايفك بالك بعيد وعدتك مشتته كل صحن في اتجاه ونارك ميتة .. ووشك ده اصلو ما عاجبني .. حاصل عليك شنو .. في واحد من الشفع ديل حص ليهو حاجة
- لالا والله الشفع كوولهم تمام .. بس جابو لي خبر عبدالصمد .. راقد عيان في المستشفي
- عبدو !! .. مالو كمان .. شايفو الصباح ماشي المدرسة كويس يااخ
- لالا عبدو اخوي ياخ .. عصفور .. ما عبدو ولدي
- اهااااااا .. هو الزول ده ظهر متين .. طولنا من اخبارو والله .. وهسع هو راقد وين
- راقد في المستشفي الكبير .. رسل لي واحد من ناس المستشفي .. وما عارفه اعمل شنو
- العمل عمل الله يا مريم .. السترة والفضيحة متباريات .. نمشي عليهو طوااالي
- فيك الخير والله ياعمر .. دايما بلقاك معاااي .. اكتر من اخو والله ..
- هوي يا مريم .. انحنا من قمنا في الحلة اكتر من الاخوان .. وعصفور ده كنت ما بفارقوا نهائي .. اليوم كلو مع بعض .. وبيتنا ياهو بيتكم .. يلا قوماكي نمشي علي الزول ده
- خير يا عمر يا اخوي .. الملم عدتي دي بس ونمشي عليهو
- في المسافة دي انا امشي اقفل المحل واجيك علي طول

الحلقة التانية

كانت عندي معرفة بي ناس المستشفي .. باعتبار انو انا المكنيكي الاول في خيارتهم .. كل عرباتهم من اسعاف ولحدي عربية مدير المستشفي .. والترحيل .. كنت بشتغلهم ليهم وبي فواتير مؤجلة السداد .. علي حب الميزانية .. لذلك اول ما جيت قدام الباب دخلونا علي طول بدون مواعيد زيارة ولا حق تذكرة .. وعلي العنابر عدل .. وبعد سؤال وفتيش لقينا عبدو (عصفور) راقد في العنبر وحالتو صعبة شديد
- سلامات يا عصفور .. سلامتك ياخ .. والله من ما سمعنا جرينا عليك جري
- الله يسلمك ياعمر .. شدة وح تزول ان شاء الله .. كيف اخبارك انت والشغل معاك
- والله كلو تمام .. المهم طمنا علي حالك انت .. مالك ملاريا ولا شنو ؟؟!
- يامريم ما دايرة تسلمي علي ولا شنو !! ما تبكي ياخ انا كويس
- والله يا عبدو اخو ما قادرة امسك دموعي .. اشوفك بالحالة دي وما ابكي
- انا كويس والله .. وما ملاريا .. مشكلة بسيطة كده في بطني وخلاص
- لالا شكلك تعبان يا عصفور ياخ .. تقول ما ابكي كيف وانت من سريرك ما قادر تقوم
- يا عمر سكت الزولة دي ياخ .. انا عشان حركاتك دي ما كنت داير اكلمك
- خلاص يامريم .. الزول قال هو كويس ياخ .. وبعدين ما تعمليها لينا بيت بكى هنا .. ولا انتي دايرة الزول ده يتعب زيادة ياااخ .. حنيتك الزيادة دي ما كويسة يااخ
- والله ما بي يدي يا جماعة .. انا لي منك كم سنة يا عصفور ياخ .. واول ما اشوفك اشوفك عيان وفي المستشفي .. وبعد ده ما ابكى .. حرام عليكم يااخ
- ياا الله يا مريم .. ما تعذبينا عليك الله .. هسع خلينا في عصفور ده وصحتو .. واخر اخبارو ياخ ..
- والله ياعمر اخباركم كوووولها معاي .. وبسال عنكم طوااالي انت ومريم اختي واولادها .. حتي اولادها بمشي مرة مرة في شارع المدرسة اشوفهم وكده !! بس من بعيد لي بعيد
- قالوا لي والله لكن ما صدقتهم يا عصفور .. شوفت عبدو ولدي .. سميتو عليك
- شفتو والله مشاء الله عليهو .. ضيعتي الولد سااي .. ما لقيتو ليهو الا الاسم ده ياخ
- هي عندها كم اخو يا عصفور ياخ .. وان شاء الله الولد يشل الاسم ويطلع شهم زيك كده .. يلا كدي انا عندي مشوار جوة المستشفي هنا .. بمشي وبجيكم راجع عشان ارجعك معاي يامريم
- خير يا عمر .. مع انك زاايغ مننا لكن ما مشكلة اخد راحتك
- ما زايغ والله بس قولت اخليكم تاخدو راحتكم مع بعض .. لانكم طولتو شديد من بعض

وبالفعل طلعت وخليتهم مع بعض .. اصلهم طولوا ما اتقابلو .. وقلت افضي ليهم الجو .. وامشي امارس هوايتي المحببة .. واعاين في العيانين واحاول ارسم قصص وحكايات من خلال الملامح والوجوه .. وما معروف احتمال القي لي زولاً بعرفوا ولا كده

لكن يا زروق ما شاء الله عليك
عندك اسلوب في السرد مبالغه
وانا في انتظار باقي الحلقات
واصل..

اهلين يا عزوفة الملهوفة

لكنا نعمل حركة بي حركتين وكده .. لكن شايف الناس عاملة غمرانة وكده

الظاهر ما عجبتهم ... شكلها بايخة وكده


نقيف لحدي هنا .. عشان مافي تفاعل وكده

يديك العافية

زروق

تمشي وين يازروق نحنا مامتابعين القصه
الناس غمرانه ماغمرانه واصل أنا متابعه يافرده

والله يا انتي الناس عملوا لينا احابط ياخ
انا اجتهد ولا في زول معبرنا ساااكت عاد ده كلام
:: وش واحد زعلان ::

جدا يافردة .. الحمدلله انتهيت منها هسع بس .. ح انزلها ليكم في شكل حلقات
بس انتي خليك قريب .. كرسيك محجوز برضو ..

زروق

ما شــــــاء الله ... عرضك مشوق ... كأنو عرض سينمائي

احجز لي مقعد ناصية

و الله يا عمو زروق مبالغه واصل انت
بس و الناس شويه شويه بيجو

المشاركة الأصلية كتبت بواسطة batboy

ما شــــــاء الله ... عرضك مشوق ... كأنو عرض سينمائي

احجز لي مقعد ناصية

اهلين يا ولدنا
العرض الاكثر سنمائية هو اني ما قادر اقرا اسمك
هاهاهاهاها

مقعدك ده داير بلدي ولا مصلح

هاهاهاها

تشكر للمرور الانيق الملون ده يا انت

المشاركة الأصلية كتبت بواسطة عازفة الدموع

و الله يا عمو زروق مبالغه واصل انت
بس و الناس شويه شويه بيجو

المبالغة يا عزوفة اني بقيت لايص بس
بين الحفلة بتاعت الترقيات وبين القصة دي


الناس بالغت اشد الانبلاغات يا انتي

زروق

الحلقة الثالثة :

طبعاً نسبة لي معرفتي بالدكاترة والممرضين .. عرفت انو عصفور عندو تليّف في الكبد .. لابد انو يتحجز في المستشفي كم يوم يعيدو فيها تشخيص الحالة .. ويعملوا صور جديدة وفحوصات اكثر دقة في المعمل الفي العاصمة بأستشارة الاخصائي هناك .. بعدين يكلموا اهلو بالحاصل عليهو .. زهلت من الخبر ده .. وما عرفت اوصل المعلومة لي مريم كيف .. تقوم تقع ولا تخش في اغماءه ولا كده وانحنا ما ناقصين .. كل القلتو ليها .. انو عندو مشكلة في المصران تقريباً وبياخد في العلاجات وكده .. وده طبعاً بالاتفاق مع عصفور .. ورجعتها البيت سريع سريع جيت راجع لي عصفور
- سلامتك يا انت .. طبعا انت عارف عندك شنو مش
- اهلين يا عمر .. تليف في الكبد مش .. من زمااااان عرفت بالكلام ده قبل كم شهر كده
- ساااكت ساااي مالك .. عاجباك حالتك دي يا اخوي .. وما تنسي اختك دي لو حصل عليك اي حاجة ما معروف يحصل ليها شنو .. انت عارف معزتك عندها قدر شنو ؟؟!!
- عارف والله .. بس ده قضاء وقدر .. كلو من الهباب البنشربو ده .. ربنا يغفر لينا ساااي
- هو انت لسع ما خليت العرقي ده يا عصفور .. المصيبة دي بتكتلك يا ود الناس .. هسع شوف عملت فيك شنو ؟؟!!
- والله الحمدلله .. الله تاب علينا وخليتها .. لكن بعد فوات الاوان .. ربنا يغفر لينا بس
- والله يا صحبي انا كلمتك قبل كده كم مرة لكن كلام القصير ما بنسمع
- والله كلامك معاااي انا مقدرو ليك .. وبالجد حاولت كم مرة اخليهو .. عشانك وعشان مريومة اختي دي .. بس تقول شنو ؟؟!! الشيطان شاطر .. واتعودنا عليهو وبقينا ما بنقدر بلاهو يا عمر يا اخوي ياخ .. استغفر الله العظيم بس
- الشيطان شنو يا عصفور .. ياخي انت كنت اشطر واحد فينا في المدرسة .. وشهادتك نجاح لكن براك ابيت المدرسة وباريت الصعاليق ورحت في حق الله
- والله يا عمر انت عارف براااك انا خليت المدرسة لي .. انت عارف من امي ماتت وابو عرس تاااني انا القعاد في البت غلبني .. وعلاقتي ساءت جدا مع ابوي ..
- عارف يا انت .. بس ده ما سبب يخليك تهرب من البيت .. وتخلي مريومة اختك برااها مع مرت ابوك دي .. وتخلي قرايتك كمان وتشرد تمشي العاصمة لا شغل ولا مشغلة ياخ
- والله ياعمر لو بتصدقني .. انا ما شردت من البيت .. ابوي طردني عديل كده
- كيف الكلام ده !! اول مرة اسمع الكلام ده والله ..
- انا ما كلمت اي زول .. جاء من الشغل لقاني بتشاكل مع مرتو بدور العارض دي .. قام ضربني .. قولت ليهو تضربني عشان المرة السمينة الوسخانة دي .. طبعا انحنا اصلا ما كنا بنريد بعض نهااائي .. كنت بعتبرها دخيله علينا .. ودايره تسرق مننا ابونا .. ابوي قال لي وسخان انت يا سجم .. انت لو راااجل امشي اشتغل اكل رقبتك دي .. بدل قاعد لي زي جمل العصارة كده اليوم كلو لافي في البيت .. لا شغلة ولا مشغلة .. قولت ليهو بتطردني من البيت يا حاج .. قال لي ايوة .. وتاني لو داير تقعد تقعد بي ادبك واحترامك .. والا قسماً عظماً اضبحك عديل كده .. بس وطلعت علي كده
- ده كلام شنو يا عصفور .. اهااا وده سبب يخليك تغيب الفترة دي كووولها عن الحلة .. واختك دي ما خايف عليها ياخ .. حتي وفاة ابوك ما ظهرت خالص ..
- في الحقيقة انا زعلت شديد والله .. وقولت انا تااني ما برجع الحلة نهااائي .. ولا داير الاقي اي زول من ناس الحلة .. وشردت العاصمة .. قلت اشغل اعمل لي قروش .. أأجر لي بيت واجيب مريومة اختي معاي ..
- وطيب مالك ما نفذت كلامك ده .. تاني ما شفناك الا وانت سكران بعد سنة من وفاة ابوك .. في عرس مريومة .. وخربت ليها عرسها بي جوطتك وكواريكك .. عملت ليها فضيحة مع نسابتها .. وهنا في السوق لافي زي الشحاد .. دي حالة ليك يا عصفور
- والله ياعمر في الاول بديت جااادي .. بس مع ظروف الشغل واصحاب السوء انجريت في سكة السكر ده .. واهملت شغلي .. سيد الدكان الكنت شغال معاهو طردني .. وبقيت لافي ضايع لا شغلة ولا مشغلة .. ح اجيب مريومة كيفن بس .. وبقيت اشتغل في السوق .. انضف لي ده البصل .. واملي لي ده اكياس الفحم .. واللقيتو امشي اسكر بيهو عشان انسي واااقعي وحياة الجحيم الانا عايش فيها دي .. لكن قاعد اسأل من اخبار مريومة اول بي اول .
- هسع عليك الله ما خجلان من روحك يا عصفور .. والله انا بتقطع من جوة وبقول ليك الكلام ده لانك انت اكتر من اخوي .. لكن لازم اقول ليك الكلام ده ياخ
- والله يا عمر انا بتقطع في اليوم اكتر من مرة .. ابسط حاجة اولاد اختي مريومة دي ما قادر امشي اسلم عليهم واقول ليهم انا خالكم .. وكت يشوفوني قدام المدرسة بخافوا مني وبقولو لي يا مجنون ..