جديد المنتدى


العودة   منتديات المقرن السودانية > القسم الرياضى > منتدي الرياضة
اسم العضو
كلمة المرور
منتدي الرياضة كرة القدم المحلية والعربية والعالمية - جميع الالعاب الرياضية .
أهلا وسهلا بك إلى منتديات المقرن السودانية.
أهلا وسهلا بك زائرنا الكريم، إذا كانت هذه زيارتك الأولى للمنتدى، فيرجى التكرم بزيارة صفحة التعليمـــات، بالضغط هنا. كما يشرفنا أن تقوم بالتسجيل بالضغط هنا

 
 
أدوات الموضوع إبحث في الموضوع انواع عرض الموضوع
#1  
قديم 05-16-2009
نفس الملاح الانكشح
شريك مبدع
دابي الخشش غير متواجد حالياً
Sudan     Male
لوني المفضل Blue
 رقم العضوية : 1155
 تاريخ التسجيل : Jul 2007
 فترة الأقامة : 2574 يوم
 أخر زيارة : 02-10-2013 (01:36 PM)
 الإقامة : سودان البلد دي
 المشاركات : 14,279 [ + ]
 التقييم : 335
 معدل التقييم : دابي الخشش is a jewel in the roughدابي الخشش is a jewel in the roughدابي الخشش is a jewel in the roughدابي الخشش is a jewel in the rough
بيانات اضافيه [ + ]
افتراضي في انتظار الوصيف




* بعد كدا ما عندنا اي (شغلة) .. ما في حاجة ورانا .. غير (الوصيف).
* خلاص ح نتفرغ للوصيف... ح نبطل اي حاجة ونتفرغ لبتوع التمهيدي ديل.
* حسمنا موضوع (الدورة الاولي) ... ح نقعد نشوف البحصل شنو؟.
* الليلة ح نتفرج علي مباراة المريخ بي فهم.
* فاضيين خالص.
* علي كيفنا.. ننتظر قودوين ... ما ننتظرو .. دي حاجة ما بتخصكم.
* قودوين يرجع بكرة ... ما يرجع... برضو دي حاجة ما بتخصكم.
* نحن نسجلوا في التكميلية .. نسجلوا في ديسمبر .. برضو دي حاجة ما بتخصكم.
* نحولوا اهلي شندي .. نلعبوا في الامل عطبرة.
* دي حاجة ما بتخصكم.
* بعدين قودوين ذاتو وقت يرجع .. ح يفهم حاجة.
* بلقي (كاريكا) ... اخصائي جراحة الاهداف (الوسيمة) قسم (التجميل) هدافا للدورة الاولي.
* وبلقي (امبيلي) ما شاءالله عليه (يجري زي الحصان).. يعني قودوين لو ما شدّ حيلو بقعد كنبة.
* دي حاجة ولا بنجامل فيها (غير قابلة للمناقشات).
* وكنبة الهلال ما كعبة معاه .. يقعد فيها هو واخوه (الكاشف).
* عارفين الكاشف منو؟.
* ما عارفين .. ما تغالطوا ساكت.
* الكاشف (ايداهور).
* عشان كدا الليلة في مباراة المريخ والشمالي مفروض جمهور الهلال يشجع لاعبو (ايداهور).
* عشان شنو؟.
* عشان ايداهور يكون (وصيف) كاريكا.
* زي شنو؟.
* زي ما المريخ وصيف للهلال .. ايداهور كمان وصيف لكاريكا في لقب هداف الدورة الاولي.
* اي حاجة نحن عندنا بي نظام.
* بالمناسبة نحن احرار.
* نلعب امبيلي .. ونطلع قودوين .. دي حاجة ما بتخصكم.
* نلعب قودوين .. ونقعد (امبيلي) في المقصورة .. برضو دي حاجة ما بتخصكم.
* نرجع كاريكا .. عشان يلعب طرف يمين .. دي حاجة ما بتخصكم.
* نعيّن (قودوين) ونبقيه (مساعد مدرب) ... برضو ما بخصكم.
* ان شاءالله نبقيه (حكم راية) ... ما بخصكم.
* نصرف نظر نهائي عن قودوين .. ونسجل الطرف الشمال لفريق الشمالي عطبرة .. برضو ما بخصكم.
* نقلب (النجيلة) .. ما نقلبها .. نخللها .. ما نخللها .. نحولها رصيد.. ما نحولها ... دي حاجة ما بتخصكم.
* قالوا ليك اتنين بقلبو هوبة في الهلال.
* قلنا ليهم شنو؟.... انتوا مالكم عاوزين تلخبطونا في البرد دا.
* قالوا لينا (مهند الطاهر) والنجيلة .. كلاهما بقلب الهوبة.
* هوبة النجيلة دي اول مرة نسمع بيها.
* قلنا ليهم غايتو يا الهلالاب .. عندكم (نجيلة) طبعها كعب بشكل.
* انا اول مرة اشوف لي (نجيلة) بتصل من الامارات .. عبر خدمة تحويل الرصيد.
* نجيلة هي ... وإلا (طعمية).
* طعمية في البرد دا.
* طعمية .. فول ... سلطة اسود .. قرع .. فجل .. دي حاجة ما بتخصكم.
* اطلعوا منها انتوا بس.
* انا ما عارف ناس يأخذوا (سبعة) من الوحدات بقعدوا يتحدثوا في (السياسة) ليه؟.
* شن خبركم انتوا بالسياسة.
* بمناسبة السياسة دي.
* قالوا ليك (مهند الطاهر) في كادوقلي قلب ليه (هوبة) .. متل الشارع الفيه ست مسارات.
* كل حركة في اتجاه.
* ما تقاطعوني يا عالم.
* هسع القاطعك منو؟... انت براك عاوز ليك سبب مع ناس (الوصيف).
* وانا عارفك .. لو جبت سيرة (الوصيف) .. بتجيب سيرة (الطابق التاني).
* ولو جبيت (سيرة الطابق) ... اكيد تجيب سيرة (التمهيدي).
* ولو جبت سيرة التمهيدي .. نحن بنقعد (نضاير) متل الكبابي في بيت العرس.
* ولو جبيت سيرة العرس .. بتجيب سيرة (الضل).
* والضل دا الليلة ما عندنا صبر ليه.
* ولو جبيت سيرة الضل ... عارفك بتعرج علي (الزمن البدل الضائع).
* وتعملها لينا كراسي ... وبصمة .. ورملة.
* البصمة عرفناها .. الرملة دي شنو؟.
* نسيت حاجة.. اصلو ما بتتخيلوها .. ما تقعدوا تقاطعوني ساكت.
* نسيت (التاكسي) الرواندي.
* قالوا ليك واحد من ناس (الوصيف) .. قال عاوز يطلع من بيتهم من غير ما (ضلو) يشعر بيه.
* نظام عاوز يزوغ من ضلو.
* قال (الضل) بعقدوا .. وبحرجوا مع نسابتو.
* نسابتو طبعا عاوزين ليهم سبب .. يفتشوا لالسبب متل (المحلية).
* قام في واحد قال ليه .. لو عاوز تزوغ من (ضلك) اطلع بدري من بيتكم .. قبل الشمس ما تشرق .. انا كل يوم بهرب منو بالطريقة دي.
* صاحبكم الوصيفابي طلع مع (النباه الاول) .. فرحان طبعا .. مفتكر .. الضل شالتو نومة.
* زولكم يمشي ويغني زي الزول الماشي علي الصراف .. يمشي ويتلفت في الشارع.
* ركب الحافلة .. وهو مفتكر .. انو الضل ما شافو.
* مع نزوله من الحافلة كدا .. الشمس شرقت .. اتلفت شمال .. لقي ليك (ضلو) ذاتو .. الما بغبّي عليه.
* قال ليه زح كدا .. الكمساري ما يشوفك .. سألني مية مرة.. كم؟... قلت ليه (واحد)... هسع لو شافك معاي يقول شنو؟.
* انت ما عارف الهلالاب ديل ما بريحو..لو لقوا ليهم فرصة زي دي بدوروا فيها للمجموعات.
* بالمناسبة دي.
* نجيلة الهلال وصلت.
* غايتو ناس الهلال ديل .. عندهم (جرجرة) بعرفوها براهم.
* النجيلة دي كل يوم يقولوا بتصل بكرة.
* نحن نشيل وننتظر في (النجيلة)... بقينا نخجل من ناس الوصيف.
* النجيلة .. شحنوها .. النجيلة حجزوا ليها .. النجيلة اتحركت.
* نجيلة هي وإلا فرقة (تامر حسني).
* الظاهر كدا .. والله اعلم .. انو ناس الهلال ديل عندهم مشكلة في (المطارات).
* تصوروا النجيلة تصل المطار وترجع.
* هي النجيلة براها.
* قودوين ذاتو شغال زي النجيلة.
* يا كاردينال .. (نجض) لينا الشغل .. الموضوع دا كدا ما بخارج معانا.
* معقولة قودوين دا ننتظر فيه من احد الي احد.
* قودوين بصل بكرة.
* تقول سوف يصل برفقة (بان كي مون).
* لا قودوين ح يتأخر شوية .. بوضياف حصلت ليه ظروف.
* بوضياف .. زوجتو عندها عملية.
* وقودوين يشيل ويتأخر.
* عملية زوجة بوضياف دي بتأخرو شهر.
* تصوروا انا بقول ليكم الكلام دا رغم ان الهلال غالب خمسة.
* خمسة في كادوقلي عارفين بتساوي كم في الخرطوم؟.
* بتساوي عشرة.
* كمان عاوزين تغالطوا .. لو ما اتعادلتم معاهم .. كنتوا بتقولوا شنو؟.
* كنتوا حميتونا النوم.
* نوم مين يا عم؟.
* انتوا مالكم .. (نجيلتنا) تصل ما تصل .. دي حاجة ما بتخصكم.
* قودوين يتأخر تاني اسبوع .. برضو حاجة ما بتخصكم.
* بعدين نحن مركزين الايامات دي علي نجيلة استاد المريخ.
* عارفين ليه؟.
* اكيد ما عارفين؟.
* عشان ح نلعب في شهر يوليو في استاد المريخ.
* قالوا ضل الهلال ح يدخل معسكر من بدري للمباراة دي.
* وقالوا كمان (الضل) ح يشارك في بطولة سيكافا.
* انا اول مرة اشوف لي (ضل) رأسو قوي كدا... بشارك في بطولات منو وليهو.
* ضل شغال علي كيفو.
* بعد كدا ما في زول يسألنا.. ما في زول يتكلم معانا .. ما عاوزين اي كلام في (السياسة).
* يوسف محمد من شفقتو مرقها لي (سويسرا).
* داريوكان مرقها لي (كشافات) الاسماعيلي.
* وريتشارد (ولدنا) .. مشي سلطنة عمان.
* علاءالدين جبريل في (عطبرة).. واسحاق كرنقو في (الحصاحيصا) .. وخالد جوليت في (بورتسودان).
* دا دفاع شنو الوزعوه كدا زي (التقسيمة).
* ديل (اطلس العالم) ما بلمهم.. كل واحد في بلد.
* تصوروا بعد دا كلو الهلال صاحب افضل دفاع.
* غايتو يا سفاري بعد الدورة الاولي دي ما تنتهي مفروض تقول عاوز ألعب (مهاجم).
* المقارنات دي في حقك ما كويسة.
* هو يعني (الهجوم) حقكم انستر.
* هجوم المريخ فيه (السعودي) قاعد في (المقصورة) .. وايداهور مرة جوة ومرة برة .. وكلتشي في (الكنبة) .. وطمبل في (التشكيلة).. ووارغو تحت المهاجمين والعجب مرة يشارك ومرة مصاب.
* الجيش دا كلو (الملك فيصل .. والسلطان عبدالحميد .. والراجمة ايداهور .. والقناص كلتشي .. والطوربيد طمبل) .. قاعد ساي.
* تتخيلوا الهلال صاحب افضل هجوم.
* كاريكا .. بيلعب في دوري فيه قرابة العشرين مهاجم اجنبي مع ذلك هداف للدوري الممتاز.
* وتتخيلوا كمان ان كاريكا في بداية الدوري الممتاز كان ما بيلعب... مع ذلك هو هداف الدوري الممتاز بعشرة اهداف.

.



 توقيع : دابي الخشش

فات الكان بدينا إحساس بالإلفة

قديم 05-16-2009   #2
شريك مبدع
نفس الملاح الانكشح


الصورة الرمزية دابي الخشش
دابي الخشش غير متواجد حالياً

بيانات اضافيه [ + ]
 رقم العضوية : 1155
 تاريخ التسجيل :  Jul 2007
 أخر زيارة : 02-10-2013 (01:36 PM)
 المشاركات : 14,279 [ + ]
 التقييم :  335
 الدولهـ
Sudan
 الجنس ~
Male
لوني المفضل : Blue
افتراضي



* يا وارغو العدد دا كتير عليك .. حساب ساكت ما بتقدر تحسبو.
* احسن دفاع (الهلال).
* احسن هجوم (الهلال).
* هداف الدوري من (الهلال).
* متصدر الدوري بفارق اربع نقاط (الهلال).
* احسن وسط طبعا (الهلال) .. ولولا وسط الهلال لم تميز الدفاع ولما احسن الهجوم .. ولما كان الهلال متصدر بفارق اربع نقاط باعتبار ان المريخ سوف ينتصر اليوم.
* غايتو ناس المريخ ديل من الدورة الاولي طلعوا بالطابق التاني وهدف وارغو.
* هدف وارغو دا عيشتو تطير.
* الهلالاب خلوا (نفرتهم) .. وخلوا (نجيلتهم) .. وقبلوا علي (هدف) وارغو.
* وارغو يعمل ليكم شنو اكتر من كدا.
* انتوا قايلين (الهدف) دا حاجة ساهلة.
* الهدف دا ممكن يحسم ليه بطولة .. وممكن يجيب (كأس) العالم.
* انتوا ساكت يا الهلالاب بتنتقدوا في (وارغو).
* وارغو دا ما كفاية عملوا معاه (ضربة جزاء).
* يتقطع ليكم يعني.
* بس وروني انتوا يعمل ليكم شنو اكتر من كدا.
* وارغو دا في (بورتسودان) عملوا معاه (مخالفة) خارج الخط... وفي (الحصاحيصا) اتسبب ليه في (كورنر).
* تاني يعمل ليكم شنو؟.
* هسع انتوا يا الهلالاب (مرق) دا جاب ليه (قون) .. بتتفاصحوا ساكت.
* مرق خلوها.
* امولادي دا جاب ليه (قون).
* شنو خليتو شغلتكم وقبلتو علي (وارغو).
* وارغو دا انتوا عارفين ظروفو.
* يمكن يكون ما (اتأقلم).
* ويمكن يكون (اتأقلم) لكن عليه شوية.
* ويمكن يكون ما عليه (شوية) .. بس انتوا ما قادرين تفهموه ساكت.
* ويمكن تكون قادرين تفهموه .. لكن (ارضية الملعب) كعبة.
* مفروض تغيروا ليه (ارضية الملعب).
* ومفروض كمان توسعوا ليه (العراضات والقوائم) شوية .. شبكتكم دي بي حالها دا وارغو ما بجيب ليكم فيها (قون).
* زيدوها متر .. مترين .. شداد ما بقول ليكم حاجة.
* لو شداد رفض شوفوا معتصم جعفر .. شركة باجعفر دي ما بترفض ليكم طلب.
* الموضوع دا ما تجاهلوه .. لحقوه (الجمعية العمومية).. الهلال ذاتو (بتعاون) معاكم في الحتة دي.
* تصوروا نحن (طلعنا اي كلام).
* وانتوا برضو طلعتوا اي كلام.
* نحن كنا مفتكرين (التعاون) القاصدو جمال الوالي في (الملعب).
* اتاريه هو قاصد حاجة تانية.
* قاصد حاجة تانية خالص.
* انت يا جمال الوالي الكراسي الـ (67) داخلة في اتفاقية (التعاون).
* خلينا نعرف عشان عندنا مباراة في الرد كاسل في يوليو القادم.
* لو الكراسي داخلة في اتفاقية (التعاون) .. يبقي علي الهلالاب ان يعملوا حسابهم علي (الكراسي).
* يقعدوا علي الكرسي بي (برشوت) .. بشويش .. بشويش.
* الواحد لو عاوز يصفق ليه لي لاعب في الهلال في المباراة يطلع (يصفق) برة الاستاد ويرجع.
* عشان شنو؟.
* عشان الكرسي ما يتكسر.. وما تجيه عوجة.
* وكمان عشان تعرفوا حاجة يا ناس الوصيف .. المباراة القادمة في الرد كاسل ح ندخل الاستاد حقكم بي مناديل ورق.
* بنكمل الرشاقة.
* اصلو قالوا (كراسيكم) حساسة شديد.
* الكرسي لو عطست ساكت جنبو .. بتتكسر فيه (كراع).
* غايتو (كراسيكم) دي حساسة بشكل.
* (الحسية) كاتلاها.
* انتوا (كراسيكم) دي ما تلحلوحها زي كراسي الهلال (الحديد).
* الكرسي لو ما عمل ليك حاجة (يشرط) ليك الجلابية.
* كراسي (تخربش) زي (الكدائس).
* انا اول مرة اشوف لي (كراسي) زي (الباكات).
* كراسينا وعاجبانا .. بتقطع هدومنا .. مالكم انتوا دي حاجة ما بتخصكم.
* كتاحتنا رابطة .. وغبارنا قائم من شارع الاربعين .. برضو ما بخصكم.
* الحاجة البتغيظ المريخاب.
* غير هدف وارغو .. انو الهلال بيلعب برة استاده .. وملعبه مقفول .. مرة في استاد المريخ ومرة في ملعب الاحرار ومرة في حديقة الفندق .. مع ذلك الجماعة ديل اتصدروا الدورة الاولي علي الاقل باربع نقاط.
* افضل دفاع (الهلال).
* افضل هجوم (الهلال).
* افضل وسط (الهلال).
* هداف الدوري من (الهلال).
* احسن طابق (المريخ).
* احسن نجيلة (المريخ).
* احسن وصيف (المريخ).
* نجيلتكم دي ابقوا عليها عشرة .. اسقوها كويس .. دي الحاجة الوحيدة التي يمكن ان تفتخروا بيها.
* المشكلة (امبيلي) عندو رأي في الحتة دي.
* الزول دا قال في يوليو ناوي علي (النجيلة) حقتكم .. عاوز يركز فيها.
* ناوي (يفلفلها) عديل كدا.
* امام اول اغسطس عملتوها لينا (كراسي) .. في يوليو ح تطالبوا تعويض في (النجيلة).
* ناس المريخ ديل عينهم قوية خالص.
* تصوروا صلاح ادريس دعمهم بي 100الف دولار والكاردينال ما قصر معاهم.
* موش مفروض يشكروا الناس ديل.
* ابدا .. ما شكروهم .. قالوا شنو؟.
* قالوا عاوزين حق الكراسي الاتكسرت.
* احرجتونا .. ودخلتونا في ضفورنا.
* دي زي الزول البتدفع ليه في المواصلات .. بعد يومين تلقاه راكب قدامك في الحافلة .. يعمل فيها ما شايفك.
* يشوف مين يا عم؟.
* وبرضو ما بخصكم. .. يدفع ما يدفع .. تدفع ليه ما تدفع ليه .. ما بخصكم.
* انتوا بس ركزوا في وصافتكم دي .. وخلوا بالكم من وارغو.


 

قديم 05-16-2009   #3
شريك مبدع
نفس الملاح الانكشح


الصورة الرمزية دابي الخشش
دابي الخشش غير متواجد حالياً

بيانات اضافيه [ + ]
 رقم العضوية : 1155
 تاريخ التسجيل :  Jul 2007
 أخر زيارة : 02-10-2013 (01:36 PM)
 المشاركات : 14,279 [ + ]
 التقييم :  335
 الدولهـ
Sudan
 الجنس ~
Male
لوني المفضل : Blue
افتراضي



هوامش
* مهند الطاهر قدم هدف (مخدوم) لمدثر كاريكا .. عشان كاريكا يأخذ رأحتو في اللقب.
* امبيلي غاب شوية .. لقي كاريكا فات.
* كاريكا ما بنتظر ليه زول.
* مباراة امس امام هلال كادوقلي جعلت اسهم دي سانتوس ترتفع في البقاء.
* المنطق والارقام تدعم بقاء دي سانتوس.
* زول شغال بالخمسات .. يعمل ليكم شنو تاني؟.
* الظاهر كدا ناس الهلال ديل عاوزين مدرب يكون شغال بالسبعات.
* اصلو بيني وبينكم المجموعات قربت.
* لكن سبعة ما كتيرة علي الوصيف.
* قالوا ناس المريخ بفكروا ينسحبوا من المجموعات .. ويتفرغوا لبطولة سيكافا.
* انتوا قايلين المجموعات لعب.
* في المجموعات عادي تتغلبوا في ملعبكم.
* من هسع اتعودا علي الموضوع دا.
* عشان ما تكون غريبة عليكم في يوليو.
* تكون غريبة كيف ؟... وانتوا اتغلبتوا في نهائي الكونفدرالية بالاربعة.
* اربعة مين يا عم؟.
* قالوا (ديالو) شكي من اضاءة ملعب استاد المريخ.
* يا ود الناس الاضاءة زي الفل .. المشكلة ما في الاضاءة.
* الود مفتح .. عاوز يعمل فيها من هسع ما شايف .. عشان ما يشارك في المجموعات.
* احسن حاجة انو ناس المريخ من هسع بقوا يدربوا في اكرم الهادي سليم علي السبعات.
* متسبعة دائما.
* حافظ عرفها.
* اصلو اكرم شيال التقيلة .. شيال السبعات.
* شهر سبعة ما ترجونا.
* مطلوب من دي سانتوس ان يرفع ايقاع الهلال من الخمسة الي السبعة.
* عشان نحن اي حاجة عندنا بي نظام.
* قالوا المريخاب في انتظار اقالة دي سانتوس عشان يستعينوا بيه.
* رادان طلع عندو (ملاريا).
* ملاريا الخواجات طبعا صعبة .. خاصة الملاريا الالمانية.
* بعد خمسات الهلال .. رادان دا تاني البرجعوا شنو؟.
* باهوس مدرب اللياقة في الهلال بتظهر بصماته في الشوط الثاني .. ولابد لنا ان نتوقف عند ارتفاع لياقة لاعبي الهلال.
* باهوس مدرب ناجح جدا .. وعارف شغلو كويس .. وقد انعكست تدريباته علي لاعبي الهلال.
* مطلوب علي وجه السرعة ان يرتب الهلال اوضاعه للدخول في معسكر خارجي في الفترة القادمة استعدادا للدورة الثانية ومرحلة المجموعات.
* الاسترخاء سوف يذهب بكل انجازات الهلال في الفترة الماضية.
* الهلال عبر المنطقة الخطرة بامان .. وهذا يستوجب منه في المرحلة المقبلة المزيد من العطاء.
* كنا نخشي علي الهلال في الفترة الماضية من حداثته .. لكنه صعد للمجموعات للمرة الثالثة علي التوالي وتصدر الدورة الاولي للممتاز بفارق اربع نقاط علي الاقل.
* شوفوا ليكم (سيكافا) .. ترفعوا بيها روحكم المعنوية.
* الممتاز ما عندكم فيه طريقة.
* المجموعات ما تفكروا فيها.
* عشان كدا ركزوا علي (سيكافا).
* جيبوا ليكم كم فريق كدا .. وانتصروا عليها .. وطلعوا واروغو هداف سيكافا.
* وخلوا لاسانا يطلع افضل لاعب في البطولة.
* وطلعوا دفاع المريخ افضل دفاع في سيكافا .. وهجوم المريخ افضل هجوم.
* لكن الحاجات دي ما تفكروا فيها في الممتاز.
* سيكافا .. مسكينة في عضمها.
* سيكافا مين يا عم؟.
* الجماعة قنعوا من المجموعات .. وقنعوا من الممتاز .. وبقوا يفكروا في سيكافا.
* لو الهلال شارك في بطولة (الحمام الميت) دا .. يبقي اقنعوا منها من بدري.
* قلنا ليكم ... خليكم في (طابقكم التاني) ... قعدتوا تغالطوا.
* خبر عاجل: في مريخابي تاني بفكر في الممتاز


 

 

مواقع النشر (المفضلة)


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع إبحث في الموضوع
إبحث في الموضوع:

البحث المتقدم
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع


الساعة الآن 07:00 PM.


Powered by vBulletin® Copyright ©2000 - 2014, Jelsoft Enterprises Ltd. TranZ By Almuhajir
HêĽм √ 3.1 BY: ! ωαнαм ! © 2010
صفحة جديدة 1

جميع الآراء والتعليقات المطروحة تمثل وجهة نظر كاتبها وليس بالضرورة وجهة نظر منتديات المقرن

قوانين منتديات المقرن