المساعد الشخصي الرقمي

مشاهدة النسخة كاملة : كلمات لا يعرفها الحناكيش


ابو العز
11-20-2007, 04:32 PM
في كتير من الكلمات جينا شايلناها معانا من القرية ونحاول الآن نتذكرها
والعندو حاجة احسن يطلعها

الحنقوق: مكنسة مصنعة من السعف
الناف: عود يوضع في رقاب البقر لربط المحراث
السعن: اناء جلدي يصنع من جلود العتان
العتود: صغير الماعز الذكر
الخمارة: بضم الخاء هي إناء فخاري لتخمير المريق والمريق هو دقيق
الذرة
المكرار: وهو الذي لا يوجد إلا حيث توجد الخمارة وسمي بذلك لأن المرأة
تستخدمه في كر المريق أي تحريكه داخل الخمارة وعادة ما تتم هذه
العملية ليلا وللمكرار صوت جميل في سكون الليل.
المرق والوسادة: وهما خشبتي الطول والعرض في العنقريب على
التوالي
وفي انتظار مساهمات اولاد الحبوبات

sassko
11-20-2007, 04:47 PM
اها يا ابو العز تعال وريني ديل
المرحاكه - القرقريبه مع ملاحظه نطق القاف بالعاميه
و الدوكه

دي حاجه شويه كدى نسخنك بيها نشوفك انت معانا ولا معانا
(منكوش ولا ود حبوبات)
لنا عوده للشرح اذا اخفقتم
لك ودي ياغالي

نبع الوفاء
11-20-2007, 10:37 PM
لوووووووووووووووووووووول


ما قصرت نهائي يا ابو العز


تشكراااات وكدا


بس يلا بعد اذنكـ

اشرح لي الكلمات دي كلها
بدوووون الاستعانة بصديق
هع





الشتم، النطع، الموليتة، الحسكنيت، الرانتوق، التبر، الضريسا، الكتوش، القرقريبة، الدوكة، المشلعيب، المرحاكة، الحسوَّة، الرتيلا، الجقر، عتيد البرم، المسلَّة،الخُرُج ، البربندي،الِّلبا، القلاَّبة، الكجَّامة، الفرار.








××××××××××××

وبجيكـ راجعة ومافي زول يغششوا يا جماعة

:0361::0361:

طارق عبد الكريم
11-21-2007, 12:08 PM
يااااااااااااي الحاجات الغريبة دي من يا تو عصر

ابو العز
11-21-2007, 03:11 PM
الغالي sassko
اشكرك على المرور والمساهمة المسابقة
المرحاكه : -حجر كبير يطحنو فيهو العيش (يبقا دقيق) والكلام دا كان زماااان لما ما كان في طواحين
القرقريبه : يعوسو بيها الكسرة والفطير وهي اما من السعف او قطعة من الصفيح صنعت خصيصاً لذلك
و الدوكه : ينجضو فيها اللحم
بالله لقيت اخوك كيف؟

ابو العز
11-21-2007, 03:58 PM
الغالية نبع الوفاء سعيد جداً جداً بها المرور والاضافة والمسابقة والامتحان الصعب دا
وانشاء الله اقدر على الاجابة واوعدك ما ح استعين بي صديق
الشتم : شتم شنو يا بت ؟ يكون قاصده النعل بكسر النون والعين
النطع : غايتو بعرف النطح : ويكون حينما تتشاجر نعجتان فتنطح احداهما الاخرى
الموليتة : يتخايل لي كده بنضفو بيها الزراعة من الحشائش والله اعلم
الحسكنيت : نوع من النباتات الضارة لغنم الرعية تعرفي الرعية؟
الرانتوق : يا بت انتي دنقلاوية يكون قصدك الارتيق وهو ظل الحيطة الذي يسع القليل من الناس
التبر : تبر وتراب والجداول والخمائل اسماء دواوين شعر لايليا ابو ماضي والتبر يعني الذهب
الضريسا : نوع من الشوك الصغير
الكتوش : الكاتيوشا نوع من طائرات الهلكوبتر الحربية والتي يستخدمها الاسرائيليين ضد الفلسطينيين
القرقريبة : يعوسو بيها الكسرة والفطير في الصاج تعرفي الصاج؟
الدوكة : اناء كبير من حديد يحمرو فيهو اللحمة
المشلعيب : مكان يوضع فيهو الاشياء مثل حلة الملاح واللبن بعيداً عن متناول الاطفال والبهايم ويصنع من الجلد
المرحاكة : حجر كبير مثل الاناء يطحنو فيهو الدقيق لصناعة الخبز
الحسوَّة : الحصوة من الامراض التي تستدعي عملية عاجلة
الرتيلا : نوع من انواع الحشائش
الجقر : هو فأر بحجم عائلي وكذلك فنان سوداني يدعى الجقر
عتيد البرم : عتيد مصغر عتود والعتود هو اصغر من العمبلوك ويكبرهم جميعاً التيس وهو مذكر الاغنام
اما البرم : فهو نوع من الحشائش والاعشاب التي يأكلها العتود وعتيد البرم كناية عن الخفة والرشاقة الكتلت اشراقة
المسلَّة : وهي تكبر الابرة وتستعمل في خياطة الشوالات
الخُرُج : مصنوع من الجلد ويوضع على الحمار او غيرة وتوضع فيه الاشياء التي يراد اخفاؤها او الاحتفاظ بها
البربندي : البرنده هي مبنى يكون امام الاوضه
الِّلبا : هو اول اللبن التخيييين حينما يضع الماعز طفله
القلاَّبة : القلاية هي التي يقلى فيها البن تعرفي الشرغرق
الكجَّامة : عبارة عن شرك كبير يصطاد به الكلب او المرفعين او الحيوانات المتوحشة والضالة
الفرار : آلة حادة من الحديد يقطع بها الخشب وغيره
يا نبع اشكرك مرة تانية لكن جبت الكلام دا من ين ؟؟؟

ابو العز
11-21-2007, 04:03 PM
العزيز طارق
الحاجات الغريبة دي كانت في زمنا نحن انا وساسكو ونبع الوفاء والساعة ديك يكون انت ما ولدوك
هههههههه

نبع الوفاء
11-22-2007, 08:09 AM
الموليتة : يتخايل لي كده بنضفو بيها الزراعة من الحشائش والله اعلم

الكتوش : الكاتيوشا نوع من طائرات الهلكوبتر الحربية والتي يستخدمها الاسرائيليين ضد الفلسطينيين


:wy::wy::wy:

لا لا لا لا

يا ابو العز بتبااااااااااااااااااااااالغ عديل كدا ياخ



كييييف الكلام دا ما صح منك
انت مش قلت انكـ ولد حبوبات؟

طبعا في حاجات كتييييرة جاوبت عليها غلط

لكن بس ال2 ديل انا حطيتهم على اساس هدية وكدا

القاك ما عارفهم
:0361::0361:




ذاكر وجاوب اجابة صحيحة

نحن عايزين نكون ديكشنري
ونوثق الحاجات ي
عشان كدا ما بيحتمل وجود اي غلط


.................


يلا بجيك راجعة بعد ما تجاوب الاجابة الصحيحة




ايوا الصاج بعرفو
:hapy:

نبع الوفاء
11-22-2007, 08:26 AM
يااااااااااااي الحاجات الغريبة دي من يا تو عصر



لا لا


حلفتكـ تعيدها تاني


هع هع

Lucky
11-22-2007, 08:47 AM
ابو العز

يا سلااام عليك وعلى موضوعك ..........بس ياخي مش الحناكيش براهم .....كتيرييين ما بعرفوها ................. يلا دايركم تعرفوا لي الكلمتين ديل كمان

1- الطيرمة ( اوعى يجي زول يقول لي دي لعبة في الكمبيوتر ههههههههههههههه)
2- الكدمبس ( بضم الكاف والدال وسكون الميم وايضا ضم الباء)

ابو العز
11-22-2007, 03:22 PM
شكراً ليك نبع على التواصل وانا كان عندي حاجات كتااااار لكن نخليها لحدي ما نحل الغازك دي

طيب

الكتوش : واحدة من مستلزمات العروس كانو بلبسوهو ليها يوم الصبحية

والله اعلم

لكن ما لقيتك حبوبه

ابو العز
11-22-2007, 03:39 PM
الروعة lucky
الاسئلة الصعبة دي نحولها لي حبوبه نبع
وانا لما عملت البوست حبيت اثقف الناس بالعندي مش امتحنا زي ما عملت نبع والبت دي شكلها كده رطانية مش هي وبس انت زاااااتك
وتسلمو على المرور الجميييل يا روعة

كورى
11-22-2007, 05:14 PM
ههههههههههههههههههههههه

والله يا ابو العز ماقصرت عشان حناكيش المنتدى ديل يتثفو حبة

تصدق فى واحدة من ناس المنتدى من غير زكر اسم مابتعرف السكن بتاع الصاج

ههههههههههه

عباس الزاكيابي
11-22-2007, 05:35 PM
تشكر الاخ ابو العز وجميع المشاركين
وفعلا موضوع هام
واحب ان اوضح لم شئيا
قد يكون الاسم خاص بصنف ما في
منطقه معينه بما يسمي في منطقه
أخري بأسم ثاني
وحقيقه أبو العز مش الحناكيش
براهم حرم انا :
خنكوش يأخوي من ما قمته
لا بعرف سجوك لا كفته
شقي وتعب للراحه تب ما ضقته
زراعه وحش وللعدار كدبته
وفي كلماتك حصه جديده
ومعلومات قبل كده بيها تب ما سمعته

الفالح
11-22-2007, 07:17 PM
أشكرك أخوي أبو العزي علي الموضوع الاكثر من رائع وانا بتمني تثبيتو لانو في حاجات كتيره هنا الناس لازم تعرفا

بس انا شايف حبوبه نبع دي صعبتها شويه

الموليته هي نوع من النبات بيقوم في الخريف مفيد جدا للأغنام ولكن مضر بالمحصول وأحيانا بياكلوهو أهلنا في القري مع الشطه والدكوه

ودا إمتحاني ليكم كمان وبالزات إنتي يانبع

بتعرفوا التكل , اب سبعين ,الملود , الكدنكه ,الودك ,اللباده بضم اللام, التبش , ام تكشو , البوده خرابه المسور , الربع , خدرة الخلا

تشكر مره تانيه يا أبو العز علي الموضوع الجميل

نبع الوفاء
11-22-2007, 10:36 PM
الكتوش : واحدة من مستلزمات العروس كانو بلبسوهو ليها يوم الصبحية

والله اعلم


ابو العز غلط


الكتوش = حلة من الحديد اتخيل لي كدا ومنتشرة لحدي الان في السودان
موجوووودة بكثرة بالاسواق وعادة كدة بتكون مخططة اكيد افتكرتها صح؟!



(( مرة طيارة ومرة من مستلزمات العروس
ابو العز ما كدة
هع هع))

نبع الوفاء
11-22-2007, 10:44 PM
التكل , اب سبعين ,الملود , الكدنكه ,الودك ,اللباده بضم اللام, التبش , ام تكشو , البوده خرابه المسور , الربع , خدرة الخلا


التكل= مطبخ صغيروني كانوا بقولوهوا ناس زمان طبعا
وحاليا موجود بس ما كتير في القرى


اب سبعين= اكل للبقر والغنم اخضر وطويل على ما اعتقد

التبش= نوع من الخضار طعمو قريب للعجور والخيار ومدور

ام تكشو= طبيخ(ملاح يعني) من البصل بيحمروهو ويحطو عليه بهارات وكدا يعني كان منتشر ايام زمااااان

خدرة الخلا= خضار الخلا يعني ؟! اعتقد قصدك كدا صح؟!


...................




يلا دا الموجود عندي في الديكشنري الخاص بي
هع


الباقي يحلوهوا باقي الجماعة



..............


والموليتة اجبت عليها اجابة صحيحة

بس انا قلت مافي زول يغششوا
دي اخر مرة طيب؟!

لوووووووووووووووووووووووول



تشكرااااات على الاكزام دا
لو عندك كمان ما مشكلة بجاوب
:hapy:

نبع الوفاء
11-22-2007, 10:46 PM
ابو العز

يا سلااام عليك وعلى موضوعك ..........بس ياخي مش الحناكيش براهم .....كتيرييين ما بعرفوها ................. يلا دايركم تعرفوا لي الكلمتين ديل كمان

1- الطيرمة ( اوعى يجي زول يقول لي دي لعبة في الكمبيوتر ههههههههههههههه)
2- الكدمبس ( بضم الكاف والدال وسكون الميم وايضا ضم الباء)



لووووووووووووووووووووووووول

ديل غلبوني
ما قدرت عليهم

ممكن تورينا الحل
يعني

الفالح
11-23-2007, 12:05 AM
يانبع العندي كتيــــــــــــــــــــــــــــــــــر

بس داير أقول ليك إنو إجاباتك صح بس خدرة الخلا دي غلط

الفالح
11-23-2007, 12:21 AM
طيب ياناس قلت أديكم الحل بتاع الحاجات دي علشان المابيعرفوها يعرفوها والبيعرفوها يتزكروها



التكل : هو المطبخ في البيت السوداني على أيام زمان وهو غرفة في منتهى البساطة

الطاقه : نافذه صغيره

المرحاكة : عبارة عن قطعة حجر كبيرة يدفن جزءها الاسفل في الارض ويبقى نصفها الاعلى بارزا

الخمارة : اناء فخاري يسمى البرمة ويحفظ فية دقيق الذرة المخلوط بالماء بنسبة معينة حتى يتخمر

القرقريبة : قطعة من السعف تستخدم لتفرد العجينه علي صاج الكسره

الدوراية : وهي اناء فخاري صغير يستخدم كطنجرة لطبخ الملاح

المفراكة : التي تشابة ادوات الخلط وتستخدم لخلط الملاح اثناء عملية الطبخ


كفاكم ولا دايرين زيااااااااااااااااااااااااده ؟؟؟؟

الفالح
11-23-2007, 12:25 AM
طيب أديكم زياده تاني


المشلعيب:

الذي تعلق فية الماكولات لحفظها لليوم التالي وهو عبارة عن شبكة صغيرة مفتوحة من طرفها الاعلى تعلق لتدلى من سقف الغرفة ويحفظ فيها الطعام بعيدا عن الحشرات , والاتربة ويستفاد فيها هنا من عملية التهوية التي تتوفر للمشلعيب .

الفالح
11-23-2007, 12:29 AM
الدوكة


وهى أداة مسطحة مصنوعة من الطين المحروق وسطحها مستوى ناعم تصنع عليها الكسرة وقد سبقت الدوكة الصاج بسنوات كثيرة

اتمني ان تعم الفائده

الفالح
11-23-2007, 12:36 AM
إضافه بسيطه للتكل


التكل


التكل يصنع من الطين والقناء والحطب ويكون مربع الشكل يشبه الى حد كبير القطية ، ويعلق فى وسطه مايسمى بالمشلعيب وهو أداة لحفظ الطعام من القطط والكلاب ويحفظ الطعام ايضاً من التعفن والنمل أقرب لكم الشكل تخيل انك تعلق بالون بواسطة خيط فى وسط الغرفة ، قاعدة المشلعيب تسع مقاس الحلة

نبع الوفاء
11-23-2007, 12:42 AM
بس داير أقول ليك إنو إجاباتك صح بس خدرة الخلا دي غلط

طيب قصدك ايه بالضبط ورينا المعنى



البوده خرابه المسور , الربع , خدرة الخلا
الملود , الكدنكه


وكمان لو تكرمت ديل برضو


وتشكر على الاضافات

:hapy:

الفالح
11-23-2007, 01:25 PM
(بس داير أقول ليك إنو إجاباتك صح بس خدرة الخلا دي غلط )

طيب قصدك ايه بالضبط ورينا المعنى






وكمان لو تكرمت ديل برضو


البوده خرابه المسور , الربع , خدرة الخلا
الملود , الكدنكه


وتشكر على الاضافات

:hapy:



خدرة الخلا دي هي الملوخيه لكن دي بينشفوها وبيشروها في صينيه ويختوها فوق راس التكل علشان ماتاكلها الغنم وبيطبخوها بيفرطقوا ليها بصل من غير زيت وساعتها بيبقي إسمها أم تكشو



أما البوده خرابه المسور والربع ديل أنواع من الحشائش تقوم في الخريف وهي غذاء جيد للغنم لكنه ضار بالمحصول زي الموليته بالظبط


اما الملود والكدنكه ديل أدوات تستخدم في الزراعه
الملود دا قنايه طويـــــــــــله وفي طرفها الأخر سكينه صغيره تشكل حرف تي وتشبه الحربه وتستخدم في إزالة الحشائش الزائده والضاره بالمحصول زي الموليته والبوده خراب المسور والربع

والكدنكه شكلها زي الطوريه وتستخدم في الحفر وغالبا ما يطلق إسم الكدنكه علي الطوريه أيضا


ولســــــــــــــــــــه جاييكم الكتيـــــــــــــــــر

sassko
11-23-2007, 10:29 PM
الشتم.. اله ايقاعيه
مش بقولوا فلان دقوا ليه الشتم
الباده هي مثل المخده توضع على
ظهر الدواب
طيب
ادونا ديل
الدبربر , الكدنكه. الكول. المرس.
امجنقر.البقو . الكجيك .
يلا شد حيلكم

cuba
11-24-2007, 12:14 AM
يا جماعة انا مابعرف كلامكم دا
اانا زي طارق
يااااااااي

نبع الوفاء
11-24-2007, 08:22 AM
تشكر على التوضيح يا الفالح


.................

ساسكو
ما عرفت اي حاجة انت بتضيع فينا ولا كيف؟!

لوووووووول

.............


كوبا كتر لي منها عليك الله
يااااااااااااااي دي


هع هع

نبع الوفاء
11-24-2007, 08:24 AM
ابو العز شكلو ح يجي يلاقي معجم بحاله هنا

صاردي
11-24-2007, 11:35 AM
كلام جميل جداً ... وغاية في الروعة .. ومن الضروري جداً المعرفة بها .


وليكم زيادة شوية كدة

السحارة .

هي عبارة عن دولاب خشبي يفتح لأعلي بشكل صندوق هرمي وهي مخزن آمن للحبوبات هي

تمثل الحارث الأمين لأغلي المجوهرات والدرر وغيرها من المهمات .

المقرون .

صندق حديدي صغير لا يتعدي ربع المتر يفتح للأعلي ويستخدم بغرض الحفظ والتخزين ويقسم لأقسام تسمي

بالعيون .
الكشمبير .


المحويت .

حبل يربط علي أرجل البقر أثناء الحليب لضمان عدم تحركها ,

الكَمتر .

هي جزور النبات التي تخرج بعد حراثة الأرض السارة .

القِربة .

إناء جلدي من أجل حفظ الماء وتبريدها ( ثلاجة ماء بدون كهرباء)

الشقردي .


حذاء بلاستكي فاتح وغالباً ما يصنع من إطارات العربات



ودمت ولي عودة بإذن الله

الفالح
11-24-2007, 02:10 PM
والله ياجماعه بقيتوها متحف عديــــــــــــــــــــــــــل

وطلعتوا حبوبات المنتدي


كويس إنو جا موضوع زي دا علشان نعرف العجايز فيكم

والفيكم اتعرفت :0191:
:30[1]:

ابو العز
11-24-2007, 03:39 PM
ابو العز شكلو ح يجي يلاقي معجم بحاله هنا

الاحباب الاعزاء
sassko نبع الوفاء طارق عبدالكريم lucky كوري عباس الزكيابي الفالح كوبا صاردي
ما عارف اقول ليكم شنو
شاكرين بلا حدود
الاخت نبع اشكرك للتواجد المستمر في هذا الموضوع واتمنى التواصل
الفالح حررررم ما قصرت وفي انتظار المزيد
ومنتظرنكم يا حبوبات
وانا ح اكتفي بالاستذاده
لكن ما لقيتكم .....ماشاء الله

sassko
11-24-2007, 10:19 PM
والله ياجماعه بقيتوها متحف عديــــــــــــــــــــــــــل

وطلعتوا حبوبات المنتدي


كويس إنو جا موضوع زي دا علشان نعرف العجايز فيكم

والفيكم اتعرفت :0191:
:30[1]:


انا عارفك قاصد
حبوبه منو

الفالح
11-25-2007, 12:28 AM
بــــــــــــــــــــــس ياها زاتها وهي عارفه نفسها

لكن هي اليومين ديل مسلوخه أسئله في اللقاء بتاع المشرفين والاعضاء هناك أصلها مستضافه اليومين ديل
هناك بنعرف انها من الستينات ولا السبعينات :bigsmile:

ابو العز
11-25-2007, 03:20 PM
العزيز الفالح
الغالي ساسكو
ومنكم نستفيد
عرفنا الحبوبات بس ما عرفنا الجدود هههههههههه
نرجو التواصل

Masood
11-25-2007, 03:48 PM
أبو العز

اقتراح : حقو تسمي البوست بتاعك دة " ركن الحبوبات" على وزن " ركن الاطفال" .....بس بالجد روووووووعة شديييييييييييييييييييييييييييييييييييييييييد

ابو العز
11-25-2007, 04:16 PM
masooood
تحياتي واشواقي
شكراً على المرور
دي فرصة نعرف اولاد وبنات الحبوبات لكن اكتشفنا حاجات اسكت ساااااي
واحسن تطلع العندك

الفالح
11-25-2007, 05:40 PM
والله يا أبو العز المنتدي دا كلو طلع حبوبات وجدود ساااااااااااااي

وانت واحد من الجدود

ههههههههههه

نبع الوفاء
11-26-2007, 04:14 AM
انا عارفك قاصد
حبوبه منو

ما تورينا منو يا ساسكو؟!
:0361:



.............

بــــــــــــــــــــــس ياها زاتها وهي عارفه نفسها

لكن هي اليومين ديل مسلوخه أسئله في اللقاء بتاع المشرفين والاعضاء هناك أصلها مستضافه اليومين ديل
هناك بنعرف انها من الستينات ولا السبعينات


يكونوا قاصدني انا ياربي؟!!

لووووووووووووووووووووووول

................


اقتراح : حقو تسمي البوست بتاعك دة " ركن الحبوبات" على وزن " ركن الاطفال" .....بس بالجد روووووووعة شديييييييييييييييييييييييييييييييييييييييييد



مسعود انا شايفة ركن الجدود بيطلع احلى
هع هع


..................



يلا ورونا همتكم واللي عندو يجيب

ابو العز لقيت غيرك اشطر ولا شنو؟!

خخخخخخخخخخ

بشير حامد
11-26-2007, 09:49 AM
الاخت نبع الوفاء مشكورة علي هذه المعلومات القيمة ودي مشاركة بسيطة ونرجوك بحث المزيد.

الشتم __ الة ايقاعية اصغر من الدلوكة
النطع __ مصنوع من السعف ويستعمل للنساء فقط(الجلوس عليه للدخان)
الموليتة __ نبات طفيلي يؤكل في بعض مناطق السودان
الحسكنيت__ نبات شوكي
الرانتوك__ نبات شوكي
الضريسة__ نبات شوكي
الكنتوش___ اناء فخاري سابقا الان يصنع من الالمونيم المصهور
الرتيلا ____ نمل صغير الحجم
البربندي ___ يستعنل لربط الحيوانات اشهرها الحمار
القلابة ____ تستعمل لصيد الطيور الصغيرة
الكجامة___ لاصتياد الفئران

اما الاخ lucky الكدمبس ____ مكان تجمع الاوساخ بالدارجي الكوشة

ابو العز
11-26-2007, 07:14 PM
والله يا أبو العز المنتدي دا كلو طلع حبوبات وجدود ساااااااااااااي

وانت واحد من الجدود

ههههههههههه

يا الفالح لما نبع بقت حبوبة ما عندي مانع
كنت متخيل روحي اتيت بما لم يأت به الاولون لقيت الجماعة ما شاء الله شطاااار
هههههههه

ابو العز
11-26-2007, 07:20 PM
!
:036


ابو العز لقيت غيرك اشطر ولا شنو؟!

خخخخخخخخخخ

ما شاء الله يا نبع وصلاة النبي عيني بااااارة
وطن الجدود نعم الوطن نفديك بالارواح نجوووود وااااطني
واااطني ..........واااطني
ههههههههههههههه

ابو العز
11-26-2007, 07:32 PM
النطع __ مصنوع من السعف ويستعمل للنساء فقط(الجلوس عليه للدخان)

البربندي ___ يستعنل لربط الحيوانات اشهرها الحمار
القلابة ____ تستعمل لصيد الطيور الصغيرة
الكجامة___ لاصتياد الفئران



العزيز الغالي بشير حامد
شكراً للاضافات القيمة والتي من خلالها بينت انك شخصية مزدوجة تجمع بين الحبوبة والجد هههههههههههه
لكن الذي يربط فيهو الحمار يسمى الكجر
والذي يستعمل لاصطياد الطيور مثل القمري والدباس ودابرك والحنجورية هو الشرك
اما الكجامة فهي تستعمل لاصطياد الحيوانات الكبيرة مثل الكلب والمرفعين والثعلب
وشكراً يا رائع

الفالح
11-26-2007, 09:17 PM
جدنا وحوبتنا أبو العز

تعديلاتك علي مشاركة بشير حامد كلها صحيحه بس القلابه دي هي فعلا زي ماقال بشير هي لإصطياد الطيور الصغيره زي ودأبرك وعشوشه وطير الجنه وغيرها

وأضيف ليكم تعديلا وبعد إذن بشير

إنو البربندي هو عبارة عن قطعة من الحديد حادة المقدمة تشبه الخازوق الذي كان أداة للعقوبة خلال فترة حكم الأتراك، هذا البربندي يدق في الأرض و يستخدم كموقع يربط فيه الحمار


ماسمعتوا بي المثل البيقول

يدقو في البربندي والحمار في شندي

بشير حامد
11-27-2007, 10:40 AM
هاكم الحاجات الجيدة دي ولو ماعرفتوها لينا رجعة للتفسير

الشابورة
البتقاه
الملود
التقنت
الكدنكة
المنجل
النجامة
الدبل
ابوستة
ابو عشرين
ود احمد
قدم حمام
فكي مستحي
ود فحل
مقد
صفراء
ابوسبيبة

بشير حامد
11-27-2007, 10:52 AM
الاخ ابو العز
شكرا علي تعليقك
اما الشرك عندنا في الوسط يصنع من شعر ذيل البقر , الحمار ,الحصان
والحاجات الجديدة الاخيرة دي متاكد من انك ونبع الوفا والفالح ماحاتاخد معكم ثواني

ابو العز
11-27-2007, 03:10 PM
جدنا وحوبتنا أبو العز

يدقو في البربندي والحمار في شندي

شكراً يا حبوبة الفالح على التعديل والاضافة اقصد المثل
والمثل دا ذكرني مثل ديك المسلمية بيعوعي وبصلتو يحمرو فيها بالرغم من الاختلاف في المثلين

ابو العز
11-27-2007, 03:20 PM
هاكم الحاجات الجيدة دي ولو ماعرفتوها لينا رجعة للتفسير

الشابورة
البتقاه
الملود
التقنت
الكدنكة
المنجل
النجامة
الدبل
ابوستة
ابو عشرين
ود احمد
قدم حمام
فكي مستحي
ود فحل
مقد
صفراء
ابوسبيبة

دي اضافات من عندي
التقنت هو طرف الجدول
والجدول هو قناة المياه التي يسقى عن طريقها الحوض
والحوض هو المكان الذي يزرع فيه الخضار ويكون مفصولاً عن غيره من الحيضان
واللبقه هي الفاصل بين الحوض والحوض والذي عن طريقه تنساب المياه الى الحوض الآخر بعد ملئ السابق

المنجل هو آلة حديدية بها اسنان ( يحشو بها (القش))
ابو سته وابو عشرين والصفراء من انواع ( العيش )
وتشكر يا غالي
اما باقي الاسئلة نتركها للاخت قصدي لي حبوبه نبع

البرلوم
11-27-2007, 03:24 PM
هههههههههههههههههه .......
والله ياابو العز باغت فيها عديل كدا ......
والله الكلمات دي ماعلي الحناكيش براهم .....
غايتو انا خايف ناس القريه زاتم تغلبم .....
تشكراتي ياجميل ...

ابو العز
11-27-2007, 03:30 PM
عزيزي البرلوم
قبل التعليق اقول ليك انا دايماً باخد في خاطري وانا بكتب كلمة برلوووووم ليه ما عارف
وتشكر على مداخلتك الجميلة

طبعاً انا كتبت الكلمات دي والمفاجأة كانت وجود كمية من الحبوبات والجدود بداخل المنتدى ههههههههههههواحسن ليك تطلع العندك هههههههههه

الفالح
11-27-2007, 06:46 PM
والله يابشير حامد المره دي بالجد صعبتها لكن قدرت علي جزءء منها

نبداء ليك


الشابورة : خبر محمص مرتين على شكل بيضاوي أو شكل خبز التوست

الملود: هو قنايه طويله في نهايتها حديده وشكلها يشبه الحربه وتستخدم في إزالة الحشائش الضاره بالمحصول زي البوده خرابه والموليته

التقنت :هي الفاصل الترابي بين كل حوض والاخر في عملية الزراعه

الكدنكة : طورية بزاوية إنحناء حادة تستخدم في الكديبة (الكديبه هي نظافة الزرع من القش الزائد)

المنجل : عبارة عن سكين منحنية صغيرة تستخدم من اجل تجميع الاعشاب

النجامة : أداة تشبه الملود وهي لازالة الحشائش يستعملها الانسان وهو جالس وأيضا تستعمل لمعالجة عجين الحلو مر

الدبل : ماعرفتها بس أعتقد انك قاصد الدبلوب وهو القوز العالي في وسط الحلة

ابوستة و ابو عشرين ديل جداول في الحواشه تستخدم لتنظيم سقي الزرع

فكي مستحي : دي بعض انواع الذره المطري وبضيف عليها من نفس النوع (عجب سيدو , أم بنين , عرفه , كوروكولو , ذهرة القدمبليه , مقد , دبر , دبر طابت , أرفع قدمك , زرزيره)

ود فحل : غايتو البعرفو انو نوع من المقاييس زي مابقولوا ليك فحل البصل وكوم البصل وشوال البصل و أردب البصل





مقد
البتقاه
ود احمد
قدم حمام
صفراء
ابوسبيبة


ديل انا غلبوني عدييييييييييل كده قلت أخليهم لي حبوبه نبع وأبو العز وبشير حامد والبقيه من عجائز المنتدي


لك مني التحيه وليك رجعه

sassko
11-27-2007, 07:14 PM
قدم حمام والصفراء نوع من حبوب الغلال

المقد نبات متسلق ذو ثمره حمراء

ود احمد

اسم لاحد زعماء العشائر:hapy:

تبقى البتقاه وابوسبيبه

خليتم للبعدي

نبع الوفاء
11-28-2007, 03:38 AM
لا غلبوني ما عرفتهم

بشير حامد
11-28-2007, 10:29 AM
1- الشابورة - هي حواشة شكلها غير المستطيل
2- التقاة - هي مساحة في الحواشة لتجميع الحبوب عند الحصاد
3-الدبل- يستعمل لري الاماكن العالية وهو اكبر من ابو عشرين
4- من ود احمد وحتي النهاية اسماء للذرة
وماخيبتو ظني ياحبايبي ابو العز والفالح وذاكري يانبع الوفاء

الفالح
11-28-2007, 12:18 PM
والله يابشير انت الماخيبت ظننا
انا كنت شاكي اني شفتك قبل كده لكن الليله عرفتك جاي من
المتحف راس علي المنتدي طوالي

هههههههههههههههههههههههه

ابو العز
11-28-2007, 03:45 PM
التحايا لكل عجايز المنتدى على المعلومات الاثرية
ونرجو التواصل
بصراحة الواحد استفاد كتير
ويانبع وينك ؟ خلاص العندك خلص ههههههههه
وجاينكم

alrawee2005
11-29-2007, 02:31 PM
الشتم : يا صاحبي دا شكلو نوع من أنواع الات الموسيقيه ..........
أو هو من أنواع الزينه التي تستدمها العروس .......
لكن الاول أعتقد هو الصاح ............


الموليتة : نوع من أنواع الاعشاب التي تنبت دون تدخل من البشر ..........

البربندي : هو عباره عن مسمار عائي يثبت في الارض وتثبت عليه
البهائم بواسطة الحبل ..........



والله يا أبو العز
ما تعدل في الكلام
ولو ما عارف عديل كدا قول ما عارف
زي نا طارق .............

نبع الوفاء
11-30-2007, 05:39 AM
هههههههههههههههه

لقيتكم تمام الليلة



ويانبع وينك ؟ خلاص العندك خلص ههههههههه



لووووووووووووووول



انا الظاهر معلوماتي خلصت هع هع


سهلوا لينا الاسئلة بالله

عشان نقدر نفيدكم وكدا

:hapy::hapy:
:hapy:

بشير حامد
12-01-2007, 02:32 PM
دي عشانك يانبع
اللدايات,القشقش,الماشة,المفراكة,الفرامة,الهباب,الب خسة,الغباشة,الفرصة,التملة,

نبع الوفاء
12-01-2007, 04:12 PM
اللدايات,

الحجار اللي بيحطوها تحت الصاج اللي بيعملوا فيه الكسرة




القشقش,

ما حصل لي الشرف بصراحة



الماشة,

بيشيلوا بيها الفحم المولع
مصنوعة من حديد


المفراكة,

المفراكة حقت المطبخ (( يستخدموها في الطبيخ يعني ))
والبعض بيسموها
الكنش
:0361:



الفرامة,

بديل السكين على شكل نص هلال كدا
هع هع


الهباب,

الهباب...
اتخيل لي قاصد هبابة يعني
حاجة يتهوو بيها في الحر وكدا
مصنوعة من السعف في الغالب


الب خسة,الغباشة,الفرصة,التملة,


مممم

ما اكذب عليك ديل ما عرفتهم خااالص
الغباشة

قاصد احتمال

(( الواحد لما يكون ما عامل زيت ولا كريم في جسمو وخصوصا ايام البرد بقولوا ليهو اغبش صح ولا ما كدة؟؟!!! ))


:hapy:


برضو احتمال

تكون

(( حاجة بيشربوها كسرة وفيها موية ولا حاجة كدا غايتو دي الاحتمالات يعني ))

لوووووووووووووول



ان شاء الله اكون جاوبت صح
:0361::0361:
:0361:

نبع الوفاء
12-01-2007, 04:24 PM
يلا بعد ما جاوبت عالاسئلة دي



اختبار ليكم

هع



يلا



حول هذه القصة إلى لهجة الحناكيش:

عمنول عشة وكت جاتا الوردة مشت لي حكيم شفخانة الحلَّة الحكيم قال ليها لازم تمشي حكيم الاسبتاليا الفي البندر، انخمَّت وفاتت.
أها وكت سعلا موجوعه من شنو قت ليهو:
قاعورد، عندي شحتفت روح، وخمة نفس، والقلب طاحونة الماحي، والخشم عرديب، واللضنين يسون صنننننننن.


طبعا لوووووول شديد ايوا عارفة
هع

يلا بسرعة وبدووون الاستعانة بصديق

وروني الاجوبة

برب

ابو العز
12-01-2007, 07:33 PM
اللدايات تلاته حجار كبار يضعو فوقها الدوكه لطهي اللحم او الصاج ( لعواسة الكسرة )
الفرامة يفرمو بيها الملوخية وهي آلة حادة نصف دائرية
الهباب عنقريب خفيف يجلس علية في ضل الضحى
والهبابه مصنوعة من سعف ويهبو بيها النار
الغباشة يكون فوق سطح اللبن بعد تسخينه (بعد يقننو )
الفرصة عبارة عن جبنة تستخرج بعد ان يكون اللبن روب بواسطة السعن
التملة هي اناء يحلب فيه اللبن

ابو العز
12-01-2007, 07:58 PM
رهييييبه يا نبع
لكن قبل ما نحول هذه القصة إلى لهجة الحناكيش نعمل ليها اولاً ترجمه والبعي يعما ليها تحويل
طيب
السنه الماضية عشه لما جاتا حمى مشت للدكتور بمستوصف المدينة والدكتور قال ليها لازم تمشي للاخصائي بالمستشفى جهزت حالها ومشت ولما سالها الدكتور عن ما تعاني منه من آلام قالت ليهو مصابه بحمى وتمزق وازمة وزيادة في دقات القلب ومرارة في الفم واللضنين يسون صننننننننن
ههههههههه
مبالغة نبع
ودي مجرد بوفه
واكيد راجعين

ابو العز
12-01-2007, 08:02 PM
يا راوينا اهلاً ومرحباً بك والبوست يتشرف بمشاركاتك
ومداخلاتك
وانا العندي بقوله
تشكر ياغالي

الفالح
12-02-2007, 12:41 AM
أها ياعجايز حصلتوا وين

معليش نسيت ماخشيت الموضوع دا لي فتره

والله لقيتكم لسه تنكتوا في الكلمات ولسع مواصلين ومواكبين

وويييين الاسئله

شكلو طقم الاسنان بتاعكم وقع وماقادرين تتكلموا

المهم ياجماعه لو في واحد منكم طقم الاسنان بتاعو مالقاهو أنا حأكون تحت الخدمه ومابقصر


طيب أديكم ديل

الملوين , القاطوع , الربق , الجفير , العكفات , البطان , الزمام , الدوناق


وليكم رجعه

ابو العز
12-02-2007, 09:56 AM
حبيبنا الفالح
شكراً يا عزيز على السؤال عن الاسنان
اطمنك يا خوي عليهن مية مية لكن الاحتياط واجب وعاااارفك مابتقصر
وكلمتك بكتب معنى جزء منها والآخر بخلي لي باقي العجايز
الجفير مصنوع من جلد وهو مكان حفظ السيف والسكين وبالنسبة للسيف يوضع على الكتف بواسطة حماله
اما السكين فتوضع في العضلات
العكفات توجد في سرج الحمار او حوية الجمل واحده امامية واخرى خلفية وهي عبارة عن عصايتان تتقابلان
البطان يكون تحت حوية الجمل حماية له من الجروح
الزمام حبل من شعر الماعز يربط في انف الناقة او الجمل ويمسك به حتى تسهل السيطرة عليه
والباقي للبقية

نبع الوفاء
12-03-2007, 04:58 AM
مية مية يا ابو العز

الفالح ما عرفت ولا كلمة

تعال راجع اجوبة ابو العز
و ورينا الاجوبة الصحيحة

هع


××××

يلا اتفضلوا



(الدِعا) بكسر الدال من الأشياء المنتشرة في مجتمعنا السوداني، أي الدُعاء على من تغضب عليه، فأكمل العبارات التالية بالجمل أو الكلمات المناسبة كما في المثال:
1ـ تعال ، تجيك الطاوية حبالا.
2ـ .......، يطير نوم عينك.
3ـ أنزل، ....................
4ـ أطلع ، ...................
5ـ ......، نعامة تزازي بيك




برب
برب

بشير حامد
12-03-2007, 12:06 PM
نبوعة ماقصرتي , ’ابو العز ياعجوز بوركت , الفالح المرة دي غلبتني ديل جبتهن من وين؟
القشقش: حطب صغار بيمسكو بيه النار
البخسة : قرعه بيهزو فيها اللبن حتي يصبح روب(زبادي)
الغباشة : روب + ماء
الفرصة : هي المرحلة التي تسبق السمن
التملة : هي قطعة القماش التي ينظف بها الصاج اثناء العواسة

بشير حامد
12-03-2007, 12:12 PM
.
1-طير يطير نوم عينك.
2- أنزل تنزل في ود الاحد
3ـ أطلع تطلع روحك

4تزازي وين نعامة تزازي بيك

الفالح
12-03-2007, 06:30 PM
حبيبنا الفالح
شكراً يا عزيز على السؤال عن الاسنان
اطمنك يا خوي عليهن مية مية لكن الاحتياط واجب وعاااارفك مابتقصر
وكلمتك بكتب معنى جزء منها والآخر بخلي لي باقي العجايز
الجفير مصنوع من جلد وهو مكان حفظ السيف والسكين وبالنسبة للسيف يوضع على الكتف بواسطة حماله
اما السكين فتوضع في العضلات
العكفات توجد في سرج الحمار او حوية الجمل واحده امامية واخرى خلفية وهي عبارة عن عصايتان تتقابلان
البطان يكون تحت حوية الجمل حماية له من الجروح
الزمام حبل من شعر الماعز يربط في انف الناقة او الجمل ويمسك به حتى تسهل السيطرة عليه
والباقي للبقية

آآآآآآآآآآآآآآآآآآآسفين علي التأخير ياشباب

ويا أبو العز والله المكان منور بي وجودك دايما

وإجاباتك صحيحه ميه الميه وأنا حأضيف عليهم البقيه


النطع : فرشه دائريه تستعملها النساء للدخان (الطلح)

الملوين : مفاتيح فتح وأقفال الخطوط الحديديه للقطار

القاطوع : مكان يوضع به صغار الماعز (البهم )

الربق : حبل يربط به صغار الماعز مع بعضهم البعض

الدوناق : عملية لقط الفول , الفاصوليا , الكبكبي

الفالح
12-03-2007, 06:42 PM
مية مية يا ابو العز

يلا اتفضلوا

1ـ تعال ، تجيك الطاوية حبالا.
2ـ .......، يطير نوم عينك.
3ـ أنزل، ....................
4ـ أطلع ، ...................
5ـ ......، نعامة تزازي بيك




نبع الوفاء وكما تعودنا
دائما
مشاركاتك الإبداعيه دي

وأنا علشان إبداعاتك دي حأهدي ليك طقم أسنان



طيب

1ـ تعال ، تجيك الطاوية حبالا.
2ـ طير، يطير نوم عينك.
3ـ أنزل، تنزل فيك صاقعه, بركة الله
4ـ أطلع ، تطلع روحك
5ـ نعم ، نعامة تزازي بيك

الفالح
12-03-2007, 06:53 PM
.
2- أنزل تنزل في ود الاحد




والله يابشير دي بالغتوا فيها عديـــــــــــــل قتلتني ضحك

انتوا شوايقه ولا شنو ؟؟؟؟؟



طيب هاكم الدفعه دي


الكركيجه , الكماشه , الشقيقه , اللشفه , المرقون , الطافات , الدنقل , الدبشق

ابو العز
01-14-2008, 08:24 PM
يا فالح
نحل منها ونفضل الباقي للجماعة
الكماشة : آلة حديدية رأسها مثل الافعى وتوجد عند النجارين عادةً لاستخراج المسامير
اللشفة : هي راجل المسلة ولها رأس مثل السنارة

الفالح
01-18-2008, 11:45 PM
ويـــــــــــــــنك يا أبو العز

وشنو الغيبه الطويله دي ؟؟؟؟


Well Come Back Home


بس حانفتقد الحبوبه نبع الوفاء

منتظركم ولسه جبت ليكم الكتير بس حبه حبه

ابو العز
01-20-2008, 08:26 PM
شكراً ياغالي
انا ياعزيزي كنت في الحج والحمد لله يعني بقيت حبوبتكم عديل الله يرحمها والآن اذهب بعد الدوام للجامعة بحضر ماجستير وبدخل البيت تلوت الليل بالله دعواتك
وبالله وين حبوبه نبع

طيب
شنو يعني التبروقه

الفالح
01-20-2008, 11:27 PM
أخونا أبو العز لو داير أخبار نبع كل العارفنو انها جامعتها فتحت وفاتت السودان

اما عن أي معلومات اخري أسأل أختها هني


التبروقه

مامتأكد منها لكن أتخيل لي إنها ضفائر تنسج من السعف

الطيب محمد
01-21-2008, 06:57 PM
لكم التحيه احبتي الكرام

ا التبروقه

في بعض الناس بقولوا التقروبه وهي تصنع من الزعف وهي للصلاة خاصه

يعني صلايه

طيب رأيكم شنو في

الأرسايه - الفاصقيه -السوكار - الوسره

الطيب محمد
01-21-2008, 07:04 PM
لكم التحيه أحبتي الكرام

التبروقه

تصنع من الزعف لغرض الصلاة تحديدا يعني صلايه

رأيكم في

الأرسايه - الفاصقيه - السوكار - الكربول

ابو العز
01-21-2008, 09:03 PM
شكراً يافالح
وياريت لو تدخل هنويه وتطمنا عن البت نبع

ابو العز
01-21-2008, 09:08 PM
عزيزي ابو الطيب
تحياتي
شكراً على المرور
والمشاركة الاضافة
في كلمات كتيرة نسمع بها ولانعرفها بس ص صدقني كلماتك دي نهااااائياً ما سمعت بيها وشكلها كده لقطها من الصين بجامع السين والصاد في كل
وفي انتظار المزيد
تسلم يا حبيب

الطيب محمد
01-23-2008, 01:08 AM
ابو العز كيفك اخوي

الكلمات دي هي من صميم العاميه البحته بتاعتنا

اولا الأرسايه هي عصا رقيقه ومثقوبه من جانب واحد وفي هذا الثقب حبل رفيع ومعقود الاطراف

وتستخدم في بناء القطاطي

الفاصقيه هي اول الجدول الرئيسي في المزارع التي تروى بواسطة الطلمبات

السوكار هو مجموعة حبال في طرف النقريب وتساعد على شد العنقريب

الكربول وهوايضا عصا ذات راس حاد وتستخدم في زراعة الاراضي والتي تكون مغموره بالمياه وقت الدميره

الوسره وهي عود ضخم يوضع على فتحة البئر لتجري عليها حبال الدلاء

طيب رايكم في

التقده - الكشاشه - البديقه - الصريف

ابو العز
01-23-2008, 07:24 PM
عزيزنا الغالي ابو الطيب
اولاً نحن سعيدين بمشاركاتك القيمة
وانت سديت لينا فرقه كبيرة تركها بعض عجايز وحبوبات المنتدى
والحاجه الوحيده العرفتها في اسئلتك الاولى هي السوكار لكن نحن بنقول ليهو الكراب
اما اسئلتك الاخيرة ففي انتظار الاجابه
ونرجو التواصل

الطيب محمد
01-23-2008, 08:47 PM
ابو العز

ياخوي انا زول صغير طوالي عايز تطلعني عجوز ولا شنو

ههههههههههههه

maxpayne
01-24-2008, 02:30 PM
سلام الله عليكم
مساهمتي لكم هى حاجة بسيطة
التكل : بضم الخا والكاف وهو المطبخ
السلوكة : اداة تستعمل في الزراعة وهي عباره عن عود من الخشب شبه مقوسة منحوتة من الامام لحفر الارض

ابو العز
01-24-2008, 10:08 PM
ابو العز

ياخوي انا زول صغير طوالي عايز تطلعني عجوز ولا شنو

ههههههههههههه

يا ابو الطيب ما تخاف
انحنا البوست دا للذين تعرضو لشيخوخة مبكرة هههههههه
وعشان انت خشيت في بوست العجايز حقو نعرفك ببعضهم
من الحبوبات حبوبه نبع
ومن العجايز جدو الفالح
واخيراً عمو الطيب هههههههه

ابو العز
01-24-2008, 10:11 PM
حبيبنا عثمان
تحياتي
شكراً على المساهمة الجميلة واجمل ما فيها انك لم تخضعنا لامتحان كما يفعل باقي العجايز
وما تزعل يا جدو ههههههه

الطيب محمد
01-24-2008, 10:30 PM
أبو العز

أنا قبلت بالعم لأنو ربما يكون اصغر من الجد والحبوبه

يلا نشرح الكلمات بتاعت امس اولا التقده وهي اله حاده تستخدم لقطع العيش اي الذره

الكشاشه وهي من الحطب زائدا القش وتستخدم كحمايه لمنازل الطين من الامطار

البديقه وهي نوع من الحراب وتكون كبيره

الصريف وهو حوش من القش يبنى حول القطاطي

ابو العز
01-24-2008, 11:25 PM
ابو الطيب
معليش
انت اظنك من القضارف واللا عارف
ياخي انت زول روعة
في جامعة السودان اليومين ديل عندهم التراث الشعبي للروابط من كل انحاء السودان يا ريت لو في طريقه تجي ... تلقى العجب
في انتظار المزيد

maxpayne
01-25-2008, 12:13 PM
مشكوووووووووور اخ عزو

الطيب محمد
01-25-2008, 04:06 PM
أبو العز

مساك نور

صدقني لم أتشرف بعد بزيارة تلك الارض المعطاءه ارض الخير القضارف

يلا ادونا رأيكم في ديل

السرسوريه * الملوينا * الكنجالات * الجاقوس * البرّيمه بكسر الباء

الطيب محمد
01-27-2008, 01:21 AM
انتو يا جماعه ما عارفين ولا متغابين العرفه ؟ يلا يا عمي ما علينا


اولا -السرسوريه هي حبل تغذف به الحجاره (في فلسطين موجود)

الملوينا - هي اله تستخدم في النجاره المسلحه

الكنجالات- جمع كنجاله وهي عود في شكل الحرف Vوتستخدم في حمل الحطب على ظهر الحمار

الجاقوس- وهو لوح خشبي يثبت على المركب بالعرض

البريمه- وهي اله تستخدم لتخريم الواح السنط في صناعة المراكب






ويلا يا ابو العز غير اسم البوست الى كلمات لا يعرفها اهل العوض

ابو العز
01-28-2008, 09:37 PM
ابو الطيب
معذرةً عزيزي الايام دي مشغول شوية عشان كدة ما قاعد ادخل النت طوالي
وبالنسبة لاسئلتك كنت عايز احل معنى كلمة واحده وهو معنى مختلف عن ما تفضلت به وهي كلمة البريمه والبريمه تعني عندنا العود الذي يبرم به الحبل
وفي انتظار المزيد من ابداعاتك

الطيب محمد
01-28-2008, 10:47 PM
لك التحيه ابو العز اخوي

انت عارف البريمه دي سيخه بحجم مسمار المركب كان شفتو وطول 50 سم وتركب في عود مكونة

الحرف تي وراسها حاد ومتعرج بخرمو بيها السنط لان مسمار المركب محلي الصنع وغير صلب

اما عودك دا نحن بنقول عليه(الملاي)

نسمة
01-29-2008, 10:27 AM
السلام عليكم ورحمة الله وبركاته

تحياتى .. أخى الطيب

مشكور جداً أخى الطيب على هذه المعلومات .. اللى حقيقى هى من واقع تراثنا وواقعنا .. بس بالجد وعن نفسى حقيقى
فى حاجات أول مرة أسمع بيها .. بعدين أنت تعال الحاجات دى والأسماء دى بتجيبها من وين :bigsmile:
مع العلم أنا ( ما حنكوشة ) لكن بالجد ماعرفتها .
على العموم تسلم كتير وفى أنتظار المزيد

الطيب محمد
01-29-2008, 11:14 AM
شكرا اختي نسمه

والله بيني وبينك الناس دي كلها حناكيش هههههههههه

يلا شوفي ديل وادينا رأيك

الكرفه بضم الكاف - القندر بضم القاف - المتلاب بضم الميم - البتاب بضم الباء

نسمة
01-29-2008, 12:05 PM
هههههههههههههههههههه

معقولة بس .. والله صعبتها .. هو أنا عرفت الأول لما أعرف ده .. بس ممكن أحاول ..:ggg::ggg:

مافى خياراااااااااااااااااااات :bigsmile:

لى عودة

ابو العز
01-29-2008, 09:14 PM
العزيز ابو الطيب
بالنسبه لاقتراحك تغيير اسم البوست من كلمات لا يعرفها الحناكيش الى كلمات لا يعرفها اهل العوض فانا موافق لكن المشكله انك بتجيب كلمات لا يعرفها لا الحناكيش ولا حتى اهل العوض
وفي انتظار حل الاسئلة الاولى والثانيه والجايه وفي انتظارك يارائع

ابو العز
01-29-2008, 09:35 PM
نسمة العز
تكمن السعادة في هذه الطله البهية وهذه الروح العلية
وهذا المرور الرائع الجميل
ونحن نطلق على رواد هذا البوست بالعجايز فمرحباً بك حبوبه نسمة
وفي انتظار المزيد

الطيب محمد
01-29-2008, 10:22 PM
يا هلا بيك ابو العز

الكرفه بضم الكاف - هي غرفه من الطين دائرية الشكل

القندر بضم القاف - هوقندول اصلا سوى كان ذره أو دخن ويقال قندر بعد ان تستخلص عنه الحبوب

يعني قندول فاضي أو فارغ

المتلاب بضم الميم - هو صغير البقر الذي لم يصل الى مرحلة العجل بعد

البتاب بضم الباء - وهي الاوساخ التي توجد في المحاصيل من رمل وحصى وما شابه ذلك



كل الود

ابو العز
01-31-2008, 08:29 PM
الاخ ابو الطيب
الشيئ الوحيد الذي عرفته هو المتلاب لكن نحن نطلق عليه المنتلاب
وشكراً لهذا التواصل الرائع يارائع

محمد صلاح الضو
02-02-2008, 09:38 AM
تحياتي شباب
انا اول مره ادخل البوست ده بس جاييكم
حقيقي لفت نظري ان البريمه لها عدة تعريفات لانني ايضا اعلم ان البريمه هي البابور الذي تحفر به الدوانكي او ابار المياه وهذه يمكن تكون اضافه ايضا الى تعريفاتها السابقه ويديكم العافيه

ابو العز
02-02-2008, 07:26 PM
العزيز الضو
اهلاً وسهلاً ويا الف مراحب
وفي انتظار اضافاتك
تحياتي

الطيب محمد
02-03-2008, 07:19 PM
ما لي لا أرى العجايز أم كانوا من الغائبين

أبو العز نسبة لكلامك انو الكلمات دي ما راح يعرفها لا الحناكيش ولا حتى اهل الجنا

لذلك سأكتب هذه الكلمات اللاتينيه مع شرحها

االدمير - وهو عود طويل في حجم الرصاصه تربط عليه الاسماك الكبيره بعد اسطيادها حتى لا تموت

المنقير - بكسر الميم وهو الحبل الذي تربط به الاسماك على الدمير

الفجير - وهو كانون يصمم خصيصا لصناعة الاكل في المراكب

الجفير - وهو غمد السيف او السكين


طيب ماهي

الشلابي

ابو العز
02-03-2008, 09:20 PM
ابو الطيب
تحياتي
طبعاً الجفير معروف لكن الدميرة عندنا باضافة التاء المربووووطة وهي تعني مياه النيل العكرة عند الفيضان
وفي انتظارك يا غالي

ود العز
02-04-2008, 05:51 PM
اولا والله ذكرتنا ايام زمااااااااااااااااااااااااااااااااااان
اها انا ود حبوبات
الكبديك:ـ هو في زمن العولمه دي اسمه اتحول إلي الطبق ( الغتو بيه صحن الكسرة )
الكمروق :ـ ودا الذوائد الفي النخلة البطلعو بيه للتمر
الكنتوش :ـ ودي الحله بتاعة الملاح بس عندها شكل غير حلل زمن العولمة وهي بتعادل التيفال اليوم
الشقيانه:ـ ودا الشبشب بتاع العرب المصنوع من جلد البقر
الجر:ـ ودا الزير حالياً
السفروق:ـ دا عصايه للصيد عند الهدندوه ( يعني ديل نحنا )
الهلوله:ـ دي الريش الموجود في سنبلة عيش الريف
البُتآب :ـ دا عيش يصنع من دقيق القمح والحلبه ( ودا كان زمن ناس أبو العز )
الجخنون:ـ دا الذقاق بلغة اليوم
الخن:ـ ودا المطبخ ( التكل يعني )
الشقشاك:ـ دي برش العروس زمان البترقص عليه ( موش زي هسي الرقيص في الصالات المغلقه)
أها أبو العز كفاك ولا نواصل ؟؟؟؟؟؟؟؟؟؟؟؟؟

ابو العز
02-04-2008, 08:27 PM
يا غالينا ياروعة
وييييينك يا جدو
والله شرفنا
ويا الف مراحب في بوست العجايز

طيب يا جدو عندي تعليق على بعض ما ورد
المروق عندنا الكروق وهو زوائد في النخلة بعد قطع جريدها ويطلعو بيها النخلة
الاشميق يوجد بين الكروق ويفتل كحبل لكراب العنقريب
القفوز وهو تلقيح البلح
السبروق نوع من الزراعة التي تطهى ( ملاح )
قال الشاعر
الجرف سبروقو ملح
والبحر فات منو روح
الجرف المساحة التي يتركها البحر بعد ان يغمرها بالطمي
وياود العز ياريت لو تواصل لعموم الفائدة
تقبل تحياتي

ود العز
02-05-2008, 04:37 PM
ابو العز ماعليك اها اديك شئ جديد لنج يلا نبدأ
المرقون:ـ هو غرفه تبني داخل غرفه وتستخدم كل المخزن
الدانقه :ـ هي الفرنده
الساسويه :ـ وهي فتات الزجاج عندما يتكسر
الكدمبس:ـ وهي مكان الفمامه ( الكوشه) بتاعة الوساخه مابتاعة العرس يابنات
الكاويقه:ـ هي حزمة القش بعد الحشيش بالمناسبة لا تطلق إلا القش اليابس
الكنش:ـ وهو المفراك( ياربي الناس ديل بعرفو المفركه؟؟)
البُقل:ـ بضم الباء وهو الضل الساخن
الرقراق:ـ وهو ضل الشجر المخلوط بضوء الشمس
الشفير:ـ وهو الدرب الذي ينزل إلي الساقيه
الديداب :ـ وهو الدرب الذي تستخدمه البهائم وسط الغابه

نواصل غداً إنشاء الله

ابو العز
02-05-2008, 07:58 PM
الغالي ود العز
يا ريت لو تداوم على الحضور والمشاركة طوااااااالي
حقيقه حصص فاقدنها من زمان واسي محتاجين ليها

في حاجات جديده علي في اضافاتك الاخيره مثل المرقون والكدمبس
نرجو المزيد
وفي انتظارك يا روعة

هندسه1
03-12-2008, 07:10 AM
المعلاق أو المشلعيب: هو ثلاجة الفقراء لحفظ الأطعمة
البلال: خيش يبل فيه السعف استعدادا للنسيج
التباب: يستخدم في صناعة نسيج السعف
المريد: خيوط تنسج من الصوف لربط البهائم
البربندي: وتد من الحديد لربط البهائم
التقنت: مرتفع ترابي بين أحواض الزراعة

ابو العز
03-13-2008, 09:48 PM
اهلاً وسهلاً ويا الف مراحب بيك
وتشكر هندسه على الاضافات القيمه
وفي انتظار جديدك

محمد الحسن
03-16-2008, 07:46 AM
كلام ميه الميه


:kkk::kkk::kkk:

ابو العز
03-17-2008, 07:49 PM
اخونا ود الحسن
شكراً على الطله الجميله وفي انتظار المزيد

الامل البعيد
04-19-2008, 04:01 PM
ممكن اعرف مصدر الكلمات دي من وين ما تقولو لي الحبوبات

نبع الوفاء
04-21-2008, 12:51 AM
ممكن اعرف مصدر الكلمات دي من وين ما تقولو لي الحبوبات


طيـــــــــــــــــــب الجدات هع هع هع


دي الحصيلة اللغوية لكل فرد ثووداني

نبع الوفاء
04-21-2008, 12:57 AM
الطيب و ود العز وهندسة وكل المشااااركين في البوثت

كسحتوووووووووووووووووووووووونا هع


ابو العز شنو الحكاية غلبتك ولا كيف؟؟!

لوووووووووووووووول


متاااااابعييين

الطيب محمد
04-21-2008, 01:38 AM
الطيب و ود العز وهندسة وكل المشااااركين في البوثت

كسحتوووووووووووووووووووووووونا هع


ابو العز شنو الحكاية غلبتك ولا كيف؟؟!

لوووووووووووووووول


متاااااابعييين

يانبع النسى قديمو تاه

ابو العز
04-27-2008, 12:36 PM
الامل البعيد
شكراً لتواجدك الجميل
ومصدر الكلمات دي تراثنا الشعبي مليان بالمصطلحات الخاصه بيهو
وكلام نبع صاح جدات واضيف عليها الحبوبات هههههههه
وانت اسأل كبارك ح تحتار وتندهش لكن ماتنسانا تكتب لينا حتى لو حبيبه يعني حتى ولو شوية
في انتظارك

ابو العز
04-27-2008, 12:42 PM
نبوعة يا نبع الوفاء
شكراً للرد على الامل البعيد
وشكراً وانت دايماً منورة البوست بتواجدك الجميل والرايع والمميز
طبعاً انت اول من يطلق عليهو لغب حبوبة في المنتدى وبصراحة تستاهليهو بي جدارة ههههههههههههههه
خليك معانا دايماً وانا ح اجيك بالجديد المفيد والكتير العجيب
وما ح اعترف بالهزيمة

ابو العز
04-27-2008, 12:45 PM
ابو الطيب وينك يازول

سنهوري الحاج
04-27-2008, 11:23 PM
اول حاجه اكتبيها صاح يابت هي الكنتوش ما الكتوش وهو نوع نوع من انواع الحلل الممتازه وبعدين الحلل دي ما مقصود بيها القرى فهمتي يا بنيه

ابو العز
04-28-2008, 09:39 PM
جدنا ود الحاج
اهلاً بيك وما فت الخاطر ويا الف مراحب
خليك معانا عشان الناس العامله فيها حبوبات يعرفو برضو معانا جدود ههههههههههه
وشكراً للتوضيح

الطيب محمد
04-28-2008, 10:12 PM
ابو الطيب وينك يازول

يا هلا بالغالي أبو العز أنا ياخوي موجود والله لاكين

كلامنا ده الناس ديل ما بعرفوه
بس مو مشكله ح نواصل بإذن الله

ام مروان
04-30-2008, 08:29 PM
الموليتة نوع من الخضار البري وبعض الناس بتاكلو وهو يشبه الخسمع اختلاف الطعم الموليتة مرةتخلط مع طماطم وبصل وشطة وملح قليلي من اسكر وجربوها مرة تاكلوها كل مرة

ابو العز
05-01-2008, 07:15 PM
يا الف مراحب بام مروان في هذا البوست الذي يتشرف بجميع عجايز المقرن
يا ام مروان شكلك طباخه ماهره من القرون الوسطى هههههههههه
وانت عرفتي الموليته وقلتي يشبه الخسمع لكن ما عرفنا الخسمع دا زاتو شنو! يا ريت توضحي وقاعدين ياكلوهو وين؟

ام مروان
05-03-2008, 08:45 AM
ابو العز انت الظاهر فات زمانك ومات فنانك ما بتعرف الخس ههههههههههههههههههه لو حقيقي من الورقيات زي الجرجير تقريبا

ابو العز
05-04-2008, 07:10 PM
ياحليلك يا النايمه على حيلك
يا بت انا لسع سعنوني يا دوبك في التلاتينات هههههه
شكراً للجرجير قصدي التوضيح

wawesy317
05-04-2008, 07:45 PM
السلاااااااااااااام عليكم
اهل البيت

احم احم احم

يا ساتر

والله اليله يا ابو العز جاييك طلب
اشرب معاك فنجان جبنه وعندي حاجه داير اعرفا

الحاحاي دا شنو امش لي ناس حاج الطيب واجيك

كب

فتك بي عافيه

ابو العز
05-05-2008, 10:35 PM
آآآآآآآآزول

مرحبتين حبابك واليوم السعيد الليله جابك

حبابك عشرة بلا كشرة وابقى لا داخل

واعتبر كونو يعني طلباتك ست عليها مجابه
علا ما قلت لي آجنا بدور تخبر الحاحاي؟
اها زول اوال اشرب التقهوج وبعدينك اللوريك شنو الحاحاي

الحاحي ياسيد الامانتليك معناتو يعني لمان تزرع القمح ويجي الطير ياكل منو بتحاحي الطير وبتسويلو الحاحاي
وانبقى النضم مو ياهو نسمع منك كمان

الطيب محمد
05-06-2008, 10:20 AM
ابو العز اخوي الحاحاي ده بسوهو لي الكوركولو وقمحك ده بسو ليه الكاكاي

هههههههههههههههههه

ابو العز
05-06-2008, 04:46 PM
والله عجايب دا نضم شنو دا
الحاحاي والكاكاي
والكوراكولو دا يبقى شنو انبقا الله هون؟
كدي خلي الواوسي دا يجي ونشوف نضمو
بالمناسبه في الشاشايه والعشايه
ابقو اعرفوها

نبع الوفاء
05-08-2008, 05:15 AM
ابو العز اخوي الحاحاي ده بسوهو لي الكوركولو وقمحك ده بسو ليه الكاكاي

هههههههههههههههههه



خخخخخخخخخخخخخخخخخخخخخخخخخخخخخخخخ

غايتو دي احلى حاجة في البوست من بدايتو


انا زااتي مستنية التوضيح مع ابو العز:0361::0361:




الشاشاية والعشاية ديل يمكن قبل ما يولدووني عشان كدا ما عرفتهم هع هع

في انتظار التوضيح وكدا


فوووتكووووم بععافاافية = فتكم بعاافية

الطيب محمد
05-10-2008, 09:01 PM
الشاشايه والعشايه

نحن عندنا الشاشاي.
وهو أبن عم شعر الدوبيت والمسادير ويؤدى بشكل شبه جماعي أثناء السير
في المسافات البعيده وشبيه لحد ما بالحداء بضم الحاء

العشايه

ما متأكد منها بس أعتقد إنها (كـــــوره)وتسمى ايضا بالطليسه والسلطانيه

الطيب محمد
05-10-2008, 09:20 PM
الغـــــــــوغايه

وهي آله بدائية الصنع تستخدمها الحريم في نظافة القطن من الشوائب والبذور
(القلقل)بضم القافين ووقت العمل عليها غالبا يكون في الظهيره ووقت الجبنه
(القهوه)في جوء نسائي خالص تكثر في الثرثره وتزداد فيه الغوغايه صريرا

والآن أطلق أسم غوغايه على الشمار فيقال غوغايه ويقال شمار كلو سته في
قواله ويبدو ان ثمة علاقة ما تربط بين غوغاية القطن وغوغاية الشمار من
ناحيه والغــــوغائيه من ناحية أخرى

ابو العز
05-11-2008, 10:13 PM
ازيك ابونا ابو الطيب
كلامك ياسيدي مية المية لكن ما عرفنا الكوركولو
اما العشاية فهي ناقه تسمى ناقة الضيف ما بحلبوها الا للضيف ويعشو بي لبنها
وربط بين الغوغائية والشمار ربط جميل

الطيب محمد
05-11-2008, 11:13 PM
ازيك ابونا ابو الطيب
كلامك ياسيدي مية المية لكن ما عرفنا الكوركولو
اما العشاية فهي ناقه تسمى ناقة الضيف ما بحلبوها الا للضيف ويعشو بي لبنها
وربط بين الغوغائية والشمار ربط جميل



الكــــوركولو
ده يا جدو ابوالعز نوع من أنواع الذره ويزرع في الجزيره ويمتاز
بطوله الفارع لذلك تتم عمليه السكب في حصاده قبل عمليه القطع
خلافا للمألوف.

ابو العز
05-13-2008, 01:11 PM
واللا مادري سكب
شو يعني يعطيك العافيي

مدن عينيك
05-13-2008, 01:56 PM
في كتير من الكلمات جينا شايلناها معانا من القرية ونحاول الآن نتذكرها
والعندو حاجة احسن يطلعها

الحنقوق: مكنسة مصنعة من السعف
الناف: عود يوضع في رقاب البقر لربط المحراث
المكرار: وهو الذي لا يوجد إلا حيث توجد الخمارة وسمي بذلك لأن المرأة
تستخدمه في كر المريق أي تحريكه داخل الخمارة وعادة ما تتم هذه
العملية ليلا وللمكرار صوت جميل في سكون الليل.
المرق والوسادة: وهما خشبتي الطول والعرض في العنقريب على
التوالي
وفي انتظار مساهمات اولاد الحبوبات
رغم أنني غير حنكوش إلا أن هذه الكلمات جديدة علي ، أنا مولود في الخرطوم وأزور أهلي ولم أسمع بهذه الكلمات لأن أهلي يتحدثون بالرطانة.

ابو العز
05-13-2008, 02:04 PM
الرطانه ديل بتفننو في تسمية الاشياء
وياريت تدينا كلمتين تلاته
اسال حبوبتك والباقي خليهو عليها
تحيرك
وفي انتظار حبوبتك قصدي في انتظارك
ويا الف مراحب بيك